रामेछाप । काठमाडौँ–खुर्कोट हुँदै मन्थली आउने–जाने बस सेवा बन्द भएपछि रामेछापका ग्रामीण भेगका बासिन्दा गम्भीर समस्यामा परेका छन्। मन्थली नगरपालिका–६ मा भएको यात्रुवाहक बस दुर्घटनापछि नेपाल अरनिको यातायात सेवा प्रालिले फागुन १ गतेदेखि बस सेवा रोकेसँगै जिल्लाको दैनिकी नै प्रभावित बनेको हो।
माघ २७ गते मन्थली नगरपालिका–६ लिलौटीमा काठमाडौँबाट ओखलढुंगातर्फ जाँदै गरेको बा.प्र. ००१–०५ ख ९९७५ नम्बरको बस तामाकोशी नदीमा खस्दा घटनास्थलमै १२ जनाको ज्यान गएको थियो भने ३ जना बेपत्ता भएका थिए। दुर्घटनामा ८ जना घाइते भएका थिए। पछि बेपत्ता तीनै जनाको शव फेला परेको जानकारी जिल्ला प्रहरी कार्यालय रामेछापले दिएको थियो।
दुर्घटनापछि पीडित पक्ष र जिल्ला प्रशासनबीच माघ २८ गते मध्यरातसम्म चलेको वार्ताबाट सहमति भए पनि मृतकका आफन्तले विभिन्न स्थानमा बस अवरोध गरेपछि अरनिको यातायातले बस सेवा पूर्ण रूपमा बन्द गरेको हो। सेवा बन्द भएपछि मन्थली हुँदै जिल्लाका ग्रामीण क्षेत्र, साथै दोलखा र ओखलढुंगातर्फ यात्रा गर्ने नागरिकहरू यातायात सुविधाबाट वञ्चितजस्तै बनेका छन्।
लिखुतामाकोशी गाउँपालिका–५ की सुमित्रा लामा बस सेवा बन्द हुँदा भोग्नुपरेको समस्याबारे भन्छिन्, “झन्डै एक हप्तादेखि गाउँ जाने बस चलेको छैन। बाबु मन्थलीमा पढ्न बसेको छ, भेट्न आएँ, तर फर्किने बस नचल्दा मन्थलीमै रोकिएको छु।” अधिकांश गाउँसम्म पुग्ने नियमित बस अरनिकै भएकाले सेवा बन्द हुँदा जनजीवन थप कष्टकर बनेको उनको गुनासो छ।
अरनिको यातायातका बस नचल्दा दैनिक करिब ७० भन्दा बढी बस आवतजावत हुने काठमाडौँ–रामेछाप रुट सुनसान बनेको छ। बस सेवा सञ्चालनबारे केन्द्रबाट कुनै निर्देशन नआएको अरनिको यातायातका रामेछाप जिल्ला इन्चार्ज सुवास फुयाँलले बताए। “अहिले रामेछापमा अरनिको बस सेवा पूर्ण रूपमा ठप्प छ। केन्द्रबाट कुनै जानकारी आएको छैन,” उनले भने। स्थानीय प्रशासनले अझै पूर्ण सुरक्षित वातावरण बनाउन नसकेको व्यवसायीहरूको गुनासो पनि उनले सुनाए।
यातायात सेवा ठप्प हुँदा सर्वसाधारणले सास्ती खेप्नुपरेको भन्दै नेपाल पत्रकार महासंघ, रामेछाप उद्योग वाणिज्य संघ, गैसस महासंघलगायत संघसंस्थाले जिल्ला प्रशासन कार्यालयको ध्यानाकर्षण गराएका छन्। नेपाल पत्रकार महासंघ रामेछापका अध्यक्ष दीपकुमार घिमिरेका अनुसार लामो समयदेखि बस सेवा बन्द हुँदा आमनागरिकको दैनिकी प्रभावित भएकाले प्रमुख जिल्ला अधिकारीसमक्ष समस्या समाधानको माग गरिएको हो।
यसबीच प्रमुख जिल्ला अधिकारी श्यामकृष्ण थापाले जिल्लामा बस सञ्चालनका लागि सुरक्षाको कुनै समस्या नरहेको दाबी गर्दै सरोकारवाला निकायसँग छलफल भइरहेकाले समस्या चाँडै समाधान हुने बताएका छन्। तर पर्याप्त सार्वजनिक यातायात नचलिरहेको मौका छोपेर केही सवारी साधनले तोकिएकोभन्दा बढी भाडा असुल्न थालेको यात्रुहरूको गुनासो छ।
बस सेवा कहिले सञ्चालनमा आउँछ भन्ने अन्योल कायमै रहँदा ग्रामीण भेगका बासिन्दा, विद्यार्थी, बिरामी र मजदुरहरू सबैभन्दा बढी मारमा परेका छन्। सर्वसाधारणले यथाशीघ्र नियमित बस सेवा सञ्चालन गर्न सरोकारवाला निकायसँग माग गरेका छन्।
