रामेछाप । यही फागुन २१ गते हुने प्रतिनिधिसभा सदस्य निर्वाचनको मिति नजिकिँदै जाँदा रामेछापमा निर्वाचन तयारी तीव्र रूपमा अघि बढेको छ । जनशक्ति व्यवस्थापनदेखि मतदाता नामावली, सामग्री ढुवानी, तालिम तथा समन्वयका काम अन्तिम चरणमा पुगेको जिल्ला निर्वाचन कार्यालयले जनाएको छ ।

आइतबार सदरमुकाम मन्थलीस्थित जिल्ला निर्वाचन कार्यालय रामेछापमा आयोजित सञ्चारकर्मीसँगको अन्तरक्रिया कार्यक्रममा जिल्ला निर्वाचन अधिकृत नारायण लामिछानेले समग्र तयारीबारे जानकारी दिनुभयो । उहाँका अनुसार निर्वाचन सञ्चालनका लागि मतदान अधिकृत २३०, सहायक मतदान अधिकृत २३०, सहायक कर्मचारी ६८४ र सहयोगी कर्मचारी १३० गरी कुल १ हजार ३७४ जना कर्मचारी परिचालन गरिनेछ। यसका लागि संघ, प्रदेश र स्थानीय तहका कर्मचारी तथा शिक्षकसमेत समेटेर २ हजार ७४ जनाको विवरण मुख्य निर्वाचन अधिकृतको कार्यालयमा पठाइसकिएको छ । तीमध्येबाट अन्तिम छनोटको प्रक्रिया भइरहेको उहाँले बताउनुभयो ।

निर्वाचन व्यवस्थापनतर्फ समानुपातिक निर्वाचन प्रणालीअन्तर्गत अस्थायी मतदाता नामावली सङ्कलनको काम पनि सम्पन्न भइसकेको छ । यस क्रममा जिल्लाभर २ हजार ४२२ जना अस्थायी मतदाता सङ्कलन भएका छन्, जसमा जिल्ला कारागारका ३९ जना मतदाता पनि समावेश छन्। अस्थायी मतदानका लागि निर्वाचन आयोगले जिल्ला कारागार र सघन सहरी तथा भवन निर्माण कार्यालयमा गरी दुईवटा केन्द्र तोकेको जनाइएको छ।

सामग्री व्यवस्थापनका हिसाबले कार्यालयबाट ३७ थरी र आयोगबाट १४ थरी सामग्री प्राप्त भइसकेको छ। मतपत्र भने सोमबार आइपुग्ने तयारी रहेको निर्वाचन अधिकृत लामिछानेले जानकारी दिनुभयो। मतदाता शिक्षाका लागि स्वयंसेवक, अनुगमनकर्ता, समन्वयकर्ता तथा विभिन्न समितिमार्फत सचेतनामूलक कार्यक्रमहरू सञ्चालन भइरहेका छन्।

मतदान अधिकृत र सहायक मतदान अधिकृतका लागि फागुन १२ देखि १४ गतेसम्म मन्थली माध्यमिक विद्यालयमा तालिम कार्यक्रम आयोजना गरिएको छ। निर्वाचनलाई स्वच्छ, निष्पक्ष र मर्यादित बनाउन मुख्य निर्वाचन अधिकृतको कार्यालय, जिल्ला प्रशासन, कोष तथा लेखा नियन्त्रक कार्यालय, सुरक्षा निकाय र अन्य सरोकारवाला निकायसँग निरन्तर समन्वय भइरहेको कार्यालयले जनाएको छ।

यस्तै, निर्वाचन खर्चलाई पारदर्शी बनाउन निर्वाचन आयोगको कार्यविधिअनुसार उम्मेदवारले अनिवार्य रूपमा बैंक खाता खोल्नुपर्ने व्यवस्था गरिएको छ। रामेछापका १७ उम्मेदवारमध्ये आइतबारसम्म ११ जनाले खाता खोलेर सिफारिस लिइसकेको जानकारी कार्यालयले दिएको छ।

मतगणना स्थल भने विगतका निर्वाचनझैँ यसपटक पनि मालपोत कार्यालयमै तोकिएको छ। जिल्ला निर्वाचन कार्यालयका अनुसार रामेछापमा १ लाख ८७ हजार ९५२ जना मतदाता रहेका छन्। निर्वाचनका लागि जिल्लाभर ९६ वटा मतदान स्थल र २२८ वटा मतदान केन्द्र निर्धारण गरिएको छ। निर्वाचन मिति नजिकिँदै जाँदा तयारीलाई अझ चुस्त र प्रभावकारी बनाइने कार्यालयको भनाइ छ।