रामेछाप, ८ फागुन । आगामी निर्वाचनलाई लक्षित गर्दै नेपाली काँग्रेस रामेछापले युवा शक्तिलाई केन्द्रमा राखेर चुनावी रणनीति अघि सारेको छ । पार्टीका उम्मेदवार रामचन्द्र खड्कालाई विजयी गराउने उद्देश्यसहित जिल्लामा विशेष युवा परिचालन समिति गठन गर्दै कांग्रेसले संगठन विस्तार र चुनावी अभियानलाई तीव्र बनाएको हो।
कांग्रेसका युवा नेता सञ्जय बुढाथोकीको संयोजकत्वमा गठन गरिएको समितिले जिल्लाका सबै वडालाई समेट्दै ८ सय १ सदस्यीय युवा परिचालन समिति निर्माण गरेको छ। समितिले वडास्तरमा सक्रिय र ऊर्जावान युवाहरूलाई समेटेर संगठनलाई थप सुदृढ बनाउने लक्ष्य लिएको जनाएको छ।
समिति गठनसँगै कांग्रेसले घरदैलो अभियान, मतदाता भेटघाट तथा प्रचार–प्रसारका कार्यक्रमलाई प्रभावकारी रूपमा अघि बढाउने तयारी गरेको छ। युवाहरूको सक्रिय सहभागितामार्फत पार्टीको नीति, कार्यक्रम र उम्मेदवारका एजेन्डा जनतासम्म पुर्याउने रणनीति बनाइएको संयोजक बुढाथोकीले जानकारी दिनुभयो।
उहाँका अनुसार आगामी दिनमा वडा हुँदै टोलस्तरसम्म विभिन्न कार्यक्रम सञ्चालन गरिनेछ। यसले स्थानीय स्तरमै चुनावी माहोल निर्माण गर्न सहयोग पुग्ने विश्वास लिइएको छ। युवा शक्तिलाई संगठित गर्दै कांग्रेसको पक्षमा जनमत निर्माण गर्ने काममा समिति सक्रिय रूपमा परिचालन हुने उहाँको भनाइ छ।
कांग्रेस रामेछापले युवालाई नेतृत्वदायी भूमिकामा अघि सार्दै चुनावी अभियानलाई थप सशक्त बनाउने रणनीति अपनाएको राजनीतिक विश्लेषकहरूको बुझाइ छ। युवाको जोश, संगठनात्मक क्षमता र प्रत्यक्ष जनसम्पर्कलाई आधार बनाएर कांग्रेसले यसपटक निर्वाचनमा निर्णायक परिणाम निकाल्ने अपेक्षा गरेको छ।
