रामेछाप । नेपाली काँग्रेसले आगामी फागुन २१ गते हुने निर्वाचनलाई लक्षित गर्दै रामेछापमा आफ्नो चुनावी रणनीति स्पष्ट पारेको छ। पार्टीका केन्द्रीय सदस्य मधुरा प्रसाद घिमिरेले फागुन १ गतेदेखि २१ गतेसम्म पार्टीका नेता, कार्यकर्ता तथा समर्थकहरू आफ्ना–आफ्ना गाउँमै बसेर सक्रिय रहन निर्देशन दिएका छन्।
नेपाली काँग्रेस रामेछापको प्रचारप्रसार शाखाले आयोजना गरेको पत्रकार सम्मेलनमा बोल्दै केन्द्रीय सदस्य घिमिरेले निर्वाचनको संवेदनशील समयमा जनतासँग प्रत्यक्ष संवाद, घरदैलो अभियान, संगठन विस्तार र प्रचार–प्रसारलाई उच्च प्राथमिकता दिनुपर्ने बताए। उनले चुनावी परिणाम गाउँस्तरको सक्रियता र मतदातासँगको निरन्तर सम्पर्कसँग प्रत्यक्ष रूपमा जोडिएको उल्लेख गरे।
घिमिरेले पार्टी पंक्तिभित्र एकता, अनुशासन र जिम्मेवारीबोध आवश्यक रहेकोमा जोड दिँदै सबै नेता–कार्यकर्ताले आफ्नो क्षेत्रमै रहेर संगठनलाई चलायमान बनाउनु पर्ने बताए। “निर्वाचन नजिकिँदै गर्दा पार्टीका सबै तहका नेता–कार्यकर्ता गाउँमै बसेर जनतासँग जोडिनु जरुरी छ,” उनले भने।
उनको निर्देशनलाई काँग्रेसको निर्वाचन केन्द्रित रणनीतिक कदमका रूपमा हेरिएको छ। पार्टी स्रोतका अनुसार स्थानीय तहमा संगठनलाई मजबुत बनाउँदै जनविश्वास थप सुदृढ गर्ने उद्देश्यले यस्तो निर्देशन आएको हो।
फागुन २१ गतेको निर्वाचन नजिकिँदै गर्दा केन्द्रीय सदस्य घिमिरेको निर्देशनले रामेछापमा काँग्रेसको चुनावी अभियानलाई थप व्यवस्थित र प्रभावकारी बनाउने अपेक्षा गरिएको छ।
