गगन थापाभन्दा देशको नेतृत्व गर्न सक्षम अर्को नेता छैन’: केन्द्रीय सदस्य घिमिरे
रामेछाप ।
नेपाली कांग्रेसका केन्द्रीय सदस्य मथुरा प्रसाद घिमिरेले सभापति गगन थापाभन्दा देशको नेतृत्व गर्न सक्षम अर्को नेता नभएको दाबी गरेका छन्। रामेछापमा आयोजित पत्रकार सम्मेलनमा बोल्दै घिमिरेले अनुभव, संगठन क्षमता, दूरदृष्टि र कार्यशैलीका आधारमा थापा नै मुलुकको नेतृत्वका लागि निर्विकल्प रहेको बताएका हुन्।
घिमिरेले सभापति थापाको नेतृत्व र निर्णय क्षमताको प्रभाव तल्लो तहसम्म देखिएको बताउँदै रामेछापमा उम्मेदवार छनोट त्यसैको उत्कृष्ट नमुना भएको उल्लेख गरे। “केन्द्रमा गगन थापाको सबल नेतृत्व र जिल्लामा रामचन्द्र खड्का जस्तो त्यागी उम्मेदवार पाएपछि कांग्रेसमा अभूतपूर्व एकता कायम भएको छ,” उनले भने।
‘खड्कालाई भोट नदिनुपर्ने कुनै कारण छैन’
केन्द्रीय सदस्य घिमिरेले सभापति थापाको नेतृत्वमा टिकट पाएका उम्मेदवार रामचन्द्र खड्काको निष्ठा र इमानदारिताले विपक्षी दलका मतदातालाई समेत आकर्षित गरेको दाबी गरे। खड्काको सादा जीवनशैली र योग्यताले जनविश्वास बढाएको भन्दै उनले चिया पसलदेखि आम चोकसम्म “रामचन्द्र खड्कालाई भोट नदिनुपर्ने कुनै कारण छैन” भन्ने आवाज सुनिन थालेको बताए।
विशेषगरी उम्मेदवार खड्काले गरेको “सांसद बनेर जाँदा र बाहिरिँदा मेरो आर्थिक अवस्था उस्तै रहनेछ, नत्र कारबाही भोग्न तयार छु” भन्ने सार्वजनिक प्रतिबद्धताले मतदातामा गहिरो प्रभाव पारेको घिमिरेको भनाइ छ।
पार्टीमा अभूतपूर्व एकता र जितको विश्वास
घिमिरेले चुनावअघि नै स्थानीय नेता, कार्यकर्ता, व्यवसायी र शुभेच्छुकहरूसँगको निरन्तर संवादले रामेछाप कांग्रेस एक ढिक्का भएको बताए। उनले स्थलगत अवलोकनका क्रममा कार्यकर्तामा देखिएको उत्साहले जित सुनिश्चित गरेको दाबी गरे।
“पार्टीभित्रको बलियो एकता, रामचन्द्र खड्का जस्तो निष्कलंक उम्मेदवार र केन्द्रमा गगन थापाको भरोसायोग्य नेतृत्व नै हाम्रो जितको आधार हो,” घिमिरेले भने, “यसपटक रामेछापमा कांग्रेसले स्पष्ट नतिजा ल्याउनेमा हामी विश्वस्त छौं।”
