रामेछाप । खाँडादेवी गाउँपालिका–९ पिङ्खुरीमा नेकपा (एमाले) परित्याग गरी स्थानीय नेता–कार्यकर्ताहरू सामूहिक रूपमा नेपाली कांग्रेसमा प्रवेश गरेका छन्।
कांग्रेसका प्रतिनिधिसभा उम्मेदवार रामचन्द्र खड्काको चुनावी प्रचार तथा घरदैलो कार्यक्रमका क्रममा आइतबार आयोजित भेटघाट कार्यक्रममा उनीहरू पार्टी प्रवेश गरेका हुन्। नेपाली कांग्रेस रामेछापका अनुसार पूर्व वडा अध्यक्ष सुवास भण्डारीको नेतृत्वमा करिब ४० जना एमाले कार्यकर्ता कांग्रेसमा समाहित भएका छन्।
नवप्रवेशीहरूलाई उम्मेदवार खड्का, पार्टीका कार्यवाहक जिल्ला सभापति नवराज थोकरलगायतले स्वागत गरेका थिए। स्वागत गर्दै नेताहरूले पार्टी प्रवेशले खाँडादेवी क्षेत्रमा कांग्रेस थप मजबुत बनेको बताएका थिए।
यसअघि मन्थली नगरपालिका–१३ फुलासीबाट पनि एमालेका एक प्रभावशाली कार्यकर्ता कांग्रेसमा प्रवेश गरिसकेका छन्। चुनावी अभियानका क्रममा विभिन्न दलबाट कांग्रेसप्रति आकर्षण बढिरहेको दाबी गर्दै उम्मेदवार खड्काले यसले निर्वाचन परिणाम आफ्नो पक्षमा आउने विश्वास व्यक्त गरेका छन्।
