प्रेस चौतारी रामेछापद्वारा ‘पुष्पलाल स्मृति पत्रकारिता पुरस्कार’ स्थापना
रामेछाप — प्रेस चौतारी नेपाल रामेछापले नेपाल कम्युनिष्ट पार्टीका संस्थापक महासचिव पुष्पलाल श्रेष्ठको स्मृतिमा ‘पुष्पलाल स्मृति पत्रकारिता पुरस्कार’ स्थापना गरेको छ। पुरस्कारको घोषणा प्रेस चौतारी नेपालको २८औँ स्थापना दिवस तथा विशेष पत्रकारिता पुरस्कार–२०८२ वितरण समारोहको अवसरमा शनिबार गरिएको हो।
यो पुरस्कारको लागि नेकपा एमालेका नेता एवं समाजसेवी रत्नप्रसाद गौतमले पाँच वर्षमा वार्षिक १ लाख रुपैयाँको दरले जम्मा ५ लाख रुपैयाँ उपलब्ध गराउने प्रतिबद्धता जनाउनुभएको छ।
स्थापित अक्षयकोषको मूलधन ५ लाख रुपैयाँको ब्याजबाट हरेक वर्ष २० हजार रुपैयाँ दरले एक जना पत्रकारलाई पुरस्कृत गरिने प्रेस चौतारी रामेछापका अध्यक्ष लेखबहादुर विकले जानकारी दिनुभयो। यसरी मूलधन स्थायी रहँदै पुरस्कार नियमित रूपमा वितरण हुनेछ।
रामेछाप जिल्ला ‘तीनलाल’ को जिल्ला भनेर परिचित छ। यसै जिल्लामा पुष्पलाल श्रेष्ठ, साहित्यका प्रथम सहिद सुब्बा कृष्णलाल अधिकारी र महान सहिद गंगालाल श्रेष्ठको जन्म भएको हो। अध्यक्ष विकले भने, “उनीहरूको योगदानलाई पत्रकारितामार्फत जीवन्त राख्न र पत्रकारहरूको उत्साह बढाउन यो पुरस्कारले महत्वपूर्ण भूमिका खेल्नेछ।”
