सर्लाही । विगतका निर्वाचन परिणाम र मत तथ्याङ्कको विश्लेषण गर्दा सर्लाही निर्वाचन क्षेत्र नम्बर ४ मा नेपाली कांग्रेसको आधार अझै पनि बलियो देखिएको छ । प्रत्यक्ष, समानुपातिक तथा स्थानीय तहको मतपरिणामले कांग्रेसलाई यहाँ अग्रस्थानमा देखाएको हो ।
२०७९ सालको प्रतिनिधिसभा निर्वाचनमा प्रत्यक्षतर्फ कांग्रेसका नागेन्द्रकुमार उम्मेदवार बनेका थिए । उनले १८ हजार २ सय ५३ मत प्राप्त गरेका थिए । यद्यपि स्वतन्त्र उम्मेदवार अमरेशकुमार सिंह २० हजार १७ मतसहित विजयी भए पनि सिंहको राजनीतिक पृष्ठभूमि र अघिल्ला निर्वाचनमा कांग्रेसबाटै विजयी भएको तथ्यले कांग्रेसको मत आधार कमजोर नभएको देखाउँछ ।
सोही निर्वाचनमा माओवादी केन्द्र निकट पृष्ठभूमिका उम्मेदवार मधुमालाकुमारी यादवले १४ हजार ६ सय २२ मत ल्याएकी थिइन् भने जनता समाजवादी पार्टीका उम्मेदवार राकेश मिश्र ५ हजार ८ सय १३ मतमा सीमित भएका थिए । मत विभाजनका कारण कांग्रेस प्रत्यक्षतर्फ पछि परेको विश्लेषण हुने गरेको छ ।
समानुपातिकतर्फको मतपरिणामले भने कांग्रेसलाई स्पष्ट रूपमा पहिलो शक्ति देखाएको छ । कांग्रेसले १६ हजार २८ मत पाउँदा जनमत पार्टीले १२ हजार ५ सय मत ल्याएको थियो । माओवादी केन्द्रले ९ हजार ७ सय र नेकपा (एमाले) ले ९ हजार ४ सय ७१ मत प्राप्त गरेका थिए । यसले दलगत आधारमा कांग्रेसको संगठनात्मक उपस्थिति अझै मजबुत रहेको संकेत गर्छ ।
स्थानीय तहको मत परिणामले पनि यही प्रवृत्ति देखाउँछ । यस क्षेत्रमा सबैभन्दा धेरै वडा नेपाली कांग्रेसले जितेको छ । कांग्रेसले १९ वडा जित्दा माओवादी केन्द्रले १२, एमालेले १०, लोसपाले ८ र जसपाले २ वडा जितेका थिए ।
वडाध्यक्ष उम्मेदवारहरूले प्राप्त गरेको मतसंख्या पनि कांग्रेसकै पक्षमा देखिन्छ । कांग्रेसका वडाध्यक्षहरूले कुल २३ हजार १ सय ४३ मत पाएका थिए । माओवादी केन्द्र १८ हजार ५ सय २४ मतसहित दोस्रो स्थानमा रह्यो । लोसपाले १४ हजार २ सय २७, एमालेले ११ हजार ४ सय ७९ र जसपाले ६ हजार ७ सय ८६ मत पाएका थिए ।
राजनीतिक विश्लेषकहरूका अनुसार प्रत्यक्षतर्फ मत विभाजन भए पनि समग्र मतगणित र संगठनात्मक संरचनाले सर्लाही–४ मा कांग्रेसको स्पष्ट आधार रहेको देखाउँछ । अघिल्ला निर्वाचनका यिनै तथ्याङ्क आगामी प्रतिस्पर्धामा पनि निर्णायक बन्न सक्ने आकलन गरिएको छ ।
