सोमवार, माघ ५, रामेछाप । आगामी प्रतिनिधिसभा सदस्य निर्वाचनको तयारीअन्तर्गत रामेछापमा उम्मेदवार मनोनयन दर्ताको कार्यतालिका तय गरी सार्वजनिक गरिएको छ। मुख्य निर्वाचन अधिकृत राजेन्द्र नेपालले सोमबार दिउँसो मनोनयन दर्तासम्बन्धी कार्यतालिका सार्वजनिक गरेका हुन्।
सार्वजनिक कार्यतालिका अनुसार फागुन २१ गते हुने प्रतिनिधिसभा निर्वाचनका लागि माघ ६ गते मंगलबार बिहान १० बजेदेखि साँझ ५ बजेसम्म उम्मेदवारको मनोनयन दर्ता गरिनेछ। मनोनयन दर्ता जिल्ला अदालत रामेछापको परिसरभित्र रहेको मुख्य निर्वाचन अधिकृतको कार्यालयमा हुने जनाइएको छ।
निर्वाचन प्रक्रिया सरल, सहज, व्यवस्थित र सुरक्षित बनाउन जिल्लामा क्रियाशील राजनीतिक दलहरूलाई तोकिएको समयमै उपस्थित भई सहकार्य गर्न आग्रह गरिएको छ। कार्यतालिका अनुसार राष्ट्रिय प्रजातन्त्र पार्टीलाई बिहान १०:३० देखि ११:३०, नेपाली कम्युनिष्ट पार्टीलाई ११:३० देखि १२:३०, राष्ट्रिय स्वतन्त्र पार्टीलाई १२:३० देखि १:३०, नेकपा (एमाले)लाई १:३० देखि २:३०, उज्यालो नेपाल पार्टीलाई २:३० देखि ३:३० र नेपाली कांग्रेसलाई अपराह्न ४ बजेदेखि साँझ ५ बजेसम्म मनोनयन दर्ताको समय तोकिएको छ।
मुख्य निर्वाचन अधिकृत राजेन्द्र नेपालका अनुसार अन्य राजनीतिक दल तथा स्वतन्त्र उम्मेदवारहरूका लागि भने बिहान १० बजेदेखि साँझ ५ बजेसम्म जुनसुकै समयमा मनोनयन दर्ता गर्न सकिने व्यवस्था गरिएको छ।
उनले निर्वाचनलाई शान्तिपूर्ण, निष्पक्ष र सफल बनाउन सबै राजनीतिक दल, उम्मेदवार तथा सरोकारवाला पक्षलाई सहकार्य गर्न आग्रह गरेका छन्।
