काठमाडौं । नेपाली कांग्रेसले पार्टीमा निष्क्रिय रहेका तथा विभिन्न कारणले असन्तुष्ट भई पार्टी छाडेका नेता–कार्यकर्तालाई पुनः पार्टीमा जोडिन आह्वान गरेको छ । निर्वाचन आयोगबाट आधिकारिकता प्राप्त गरेपछि बसेको कांग्रेस केन्द्रीय कार्यसमितिको दोस्रो बैठकले यस्तो निर्णय गरेको हो ।
बैठकपछि पार्टी प्रवक्ता देवराज चालिसेले पार्टीभित्रको एकता, सहकार्य र संगठन सुदृढीकरणका लागि निष्क्रिय र बाहिरिएका नेता–कार्यकर्तालाई पुनः समेट्ने निर्णय गरिएको जानकारी दिए । उनका अनुसार कांग्रेसलाई आगामी निर्वाचनका चुनौती सामना गर्न सबै पक्षको सहभागिता आवश्यक रहेको बैठकको निष्कर्ष छ ।
प्रवक्ता चालिसेले पार्टीभित्र विगतमा देखिएका असन्तुष्टि र मतभेदलाई संवादका माध्यमबाट समाधान गर्दै अघि बढ्ने नीति लिइएको बताए । पार्टीलाई बलियो बनाउन सबै कांग्रेसजनको योगदान आवश्यक रहेको उल्लेख गर्दै उनले पुनः पार्टीमा फर्केर सक्रिय भूमिका निर्वाह गर्न आग्रह गरे ।
केन्द्रीय समितिको बैठकले आगामी फागुन २१ गते हुने निर्वाचनमा कांग्रेसलाई विजयी बनाउन देश–विदेशमा रहेका सबै कांग्रेसजनलाई नयाँ ऊर्जा र एकतासहित चुनावी अभियानमा सक्रिय हुन अपिल गर्ने निर्णय पनि गरेको छ । यसका लागि संगठन विस्तार, मतदाता सम्पर्क र चुनावी तयारीलाई तीव्र बनाइने बताइएको छ ।
बैठकले नेपाली कांग्रेसकै नेतृत्वमा मुलुकलाई अघि बढाउने प्रक्रियामा जनताको साथ र सहयोग प्राप्त हुने विश्वास व्यक्त गरेको प्रवक्ता चालिसेले जानकारी दिए । पार्टीभित्र एकता कायम गर्दै सबै धारलाई समेटेर अघि बढ्नु नै कांग्रेसको मुख्य प्राथमिकता रहेको उनले बताए ।
