काठमाडौँ । नेपाली कांग्रेसका नेता डा. सुनिल शर्माले विशेष महाधिवेशन पार्टीभित्रको उत्पीडन र परिवर्तनको चाहनाको परिणाम भएको बताएका छन् । शनिबार काठमाडौँमा आयोजित एक कार्यक्रमपछि सञ्चारकर्मीहरूसँग कुरा गर्दै उनले पार्टीभित्र लामो समयदेखि देखिएको असन्तुष्टि, अन्याय र असमान व्यवहारका कारण विशेष महाधिवेशन अपरिहार्य बनेको बताएका हुन् ।
डा. शर्माका अनुसार विगत पाँच वर्षभित्र कांग्रेसभित्र नहुनुपर्ने धेरै गतिविधि भएका थिए । संस्थापनमा नलागेका नेताकार्यकर्तामाथि उत्पीडन भएको, टिकट वितरणमा चलखेल भएको र आन्तरिक लोकतन्त्र कमजोर बनाइएको कारण पार्टीभित्र परिवर्तनको आवाज बलियो बन्दै गएको उनले बताए । यही पृष्ठभूमिमा विशेष महाधिवेशन भएको र त्यसले नयाँ नेतृत्व चयन गरेको उनको भनाइ छ ।
उनले निर्वाचन आयोगबाट आधिकारिकता प्राप्त नयाँ नेतृत्वलाई सबै पक्षले स्वीकार गरेर अघि बढ्नुको विकल्प नरहेको स्पष्ट पारे । नवनिर्वाचित सभापति गगन थापाको नेतृत्वमा कांग्रेसलाई एकताबद्ध बनाएर अघि बढाउने जिम्मेवारी नेतृत्वको रहेको उल्लेख गर्दै उनले संस्थापन पक्षका नेताहरू पनि नयाँ नेतृत्वसँग मिलेर जानुपर्ने धारणा राखे ।
डा. शर्माले कांग्रेस विभाजित नभएको दाबी गर्दै पार्टीभित्र अब विवादलाई अगाडि बढाउने कुनै ठाउँ नरहेको बताए । उनका अनुसार विशेष महाधिवेशन पार्टी फुटाउन नभई कांग्रेसलाई थप सुदृढ, लोकतान्त्रिक र जनमुखी बनाउनका लागि भएको हो ।
आगामी निर्वाचनका सन्दर्भमा उनले नेपाली कांग्रेस एक्लै चुनावी प्रतिस्पर्धामा जाने र २६५ वटै निर्वाचन क्षेत्रमा उम्मेदवार उठाउने दाबी गरे । बहुमतसहित कांग्रेस सरकार बनाउने र सभापति गगन थापा प्रधानमन्त्री बन्ने विश्वास समेत उनले व्यक्त गरे ।
डा. शर्माले देउवा पक्ष अन्य दलसँग मिल्न जाने सम्भावना नरहेको उल्लेख गर्दै अब कांग्रेसभित्र विगतका कमजोरी नदोहोरिने विश्वास व्यक्त गरे । विशेष महाधिवेशनले जनताको चाहनाअनुसार परिवर्तनको संकेत दिएको भन्दै उनले सबै पक्ष एक भएर अघि बढ्नुपर्नेमा जोड दिए ।
