मेरो प्रदेश डेक्स
मन्थली, माघ २
तामाङ समुदायको बाहुल्यता रहेको रामेछापको सुनापति गाउँपालिकाले सोनाम ल्होछारको अवसरमा दुई दिन थप स्थानीय बिदा दिने निर्णय गरेको छ। पालिकाका अनुसार माघ ४ र ६ गते स्थानीय बिदा दिइएको हो । ५ गते भने सोनाम ल्होछार रहेकोले देशभर सरकारले बिदा दिएको छ ।
यस अवधिमा गाउँपालिका भित्रका वडा कार्यालय, स्वास्थ्य संस्था, विद्यालय, बैंक तथा वित्तीय संस्थाहरू बन्द रहने छन्। तामाङ समुदायको सम्मान र उनीहरूको संस्कृति संरक्षणका लागि संविधानले दिएको अधिकार प्रयोग गर्दै बिदा दिने निर्णय गरिएको पालिकाले जनाएको छ ।
तामाङ समुदायले प्रत्येक वर्ष सोनाम ल्होछारलाई धार्मिक तथा सांस्कृतिक पर्वका रूपमा मनाउँदै आएका छन् । तामाङ भाषामा ‘ल्हो’ भनेको वर्ष र ‘छार’ भनेको नयाँ भन्ने अर्थ लाग्दछ, जसले ल्होछारलाई नयाँ वर्षका रूपमा चिनाउँछ। चन्द्र पात्रोअनुसार माघ शुक्ल प्रतिपदाका दिन ल्होछार मनाइन्छ।
ल्होछारमा १२ वटा जीवजन्तुका नाममा आधारित ल्हो खोर्लो (वर्ष चक्र) अनुसार पुरानो वर्षलाई विदाइ र नयाँ वर्षलाई स्वागत गर्दै विभिन्न धार्मिक तथा सांस्कृतिक विधि गरिन्छ।