रामेछाप । लिखुतामाकोशी गाउँपालिकाले सार्वजनिक सेवा प्रवाहलाई पारदर्शी, प्रभावकारी र जवाफदेही बनाउने प्रतिबद्धता व्यक्त गरेको छ । गाउँपालिकाले गत आर्थिक वर्ष २०८१र८२ को वार्षिक समीक्षा तथा चालु आर्थिक वर्ष २०८२र८३ को अर्धवार्षिक अवधिसम्म प्रदान गरिएका सेवा–सुविधाको प्रभावकारिताबारे सार्वजनिक सुनुवाइ कार्यक्रम आयोजना गर्दै सेवा सुधारमा जोड दिएको हो ।
मङ्गलबार लिखुतामाकोशी गाउँपालिका–स्थित झट्टेश्वर माध्यमिक विद्यालयमा सम्पन्न सार्वजनिक सुनुवाइ कार्यक्रममा सार्वजनिक सेवा प्रवाहको वर्तमान अवस्था, देखिएका चुनौती र सुधारका उपायबारे विस्तृत छलफल गरिएको थियो । कार्यक्रममा सेवाग्राहीहरूले सेवामा ढिलाइ हुने, प्रक्रियागत जटिलता, सूचना प्रवाहको कमीलगायत गुनासो राखेका थिए । विशेषगरी सिफारिस, दर्ता, सामाजिक सुरक्षा भत्ता, योजना कार्यान्वयन तथा विकास निर्माणसम्बन्धी सेवामा थप सुधार आवश्यक रहेको धारणा सहभागीहरूले व्यक्त गरे ।
कार्यक्रममा गाउँपालिका अध्यक्ष केशव महतले स्थानीय सरकारको मुख्य प्राथमिकता सार्वजनिक सेवालाई प्रभावकारी, पारदर्शी र जनमुखी बनाउनु रहेको बताए । सार्वजनिक सुनुवाइमा उठेका गुनासा र सुझावलाई गम्भीर रूपमा लिँदै नीतिगत तथा व्यवहारिक सुधारमार्फत सेवा प्रवाहलाई सहज बनाइने उनले प्रतिबद्धता जनाए ।
यसैगरी गाउँपालिका उपाध्यक्ष दिपा पाख्रिनले सेवाग्राहीमैत्री वातावरण निर्माणमा पालिका निरन्तर प्रयासरत रहेको उल्लेख गर्दै महिला, ज्येष्ठ नागरिक तथा विपन्न वर्गको सेवामा पहुँच सुनिश्चित गर्न थप पहल गरिने बताइन् ।
कार्यक्रममा प्रशासकीय अधिकृत मातृकाप्रसाद दाहाल, विभागीय प्रमुखहरू, स्थानीय जनप्रतिनिधि, विभिन्न राजनीतिक दलका प्रतिनिधि, नागरिक समाजका अगुवा, सञ्चारकर्मी तथा स्थानीयवासीको उल्लेख्य सहभागिता रहेको थियो । सहभागी राजनीतिक दलका प्रतिनिधिहरूले जनप्रतिनिधिसँगै कर्मचारीहरू पनि जिम्मेवार बन्नुपर्नेमा जोड दिँदै गाउँपालिकाको स्थायी भवन निर्माण हुन नसकेकोप्रति दुख व्यक्त गरेका थिए । उनीहरूले सेवा प्रवाहलाई थप व्यवस्थित बनाउन छिटोभन्दा छिटो गाउँपालिकाको भवन निर्माण प्रक्रिया अगाडि बढाउन आग्रह गरेका छन् ।
यस किसिमका सार्वजनिक सुनुवाइ कार्यक्रमले सेवा प्रदायक र सेवाग्राहीबीच प्रत्यक्ष संवाद स्थापित गर्दै समस्या पहिचान र समाधानमा सहयोग पुग्ने विश्वास सहभागीहरूले व्यक्त गरेका छन् ।
