रामेछाप। बागमती प्रदेश सञ्चार रजिष्ट्रारको आयोजनामा नेपाल पत्रकार महासङ्घ रामेछापद्वारा सञ्चालित पत्रकारहरूका लागि तीन दिने आर्टिफिसियल इन्टेलिजेन्स (एआई) सम्बन्धी तालिम मन्थलीमा सम्पन्न भएको छ। तालिममा जिल्लाका २७ जनाभन्दा बढी पत्रकारहरूको सहभागिता रहेको थियो।
तालिम समापन कार्यक्रममा मन्थली नगरपालिका प्रमुख लव श्रेष्ठले तथ्यमा आधारित पत्रकारिताले सुशासन प्रवर्धनमा महत्वपूर्ण भूमिका खेल्ने बताएका छन्। प्रविधि र पत्रकारिताको विकास एक–अर्कासँग जोडिएको उल्लेख गर्दै उनले सही तथ्य र प्रमाणमा आधारित समाचारले पारदर्शिता र जवाफदेहिता बलियो बनाउने धारणा व्यक्त गरे।
नगरप्रमुख श्रेष्ठले जिल्लास्तरमा कार्यरत पत्रकारहरूले पनि राष्ट्रिय तथा अन्तर्राष्ट्रिय स्तरको कार्यसम्पादन गर्न सक्ने क्षमता विकास गर्नुपर्ने बताए। उनले तथ्य र प्रमाणसहित प्रस्तुत समाचारलाई कसैले अस्वीकार गर्न नसक्ने उल्लेख गर्दै निर्भिक पत्रकारिताको आवश्यकतामा जोड दिए।
कार्यक्रममा बागमती प्रदेशका सञ्चार रजिष्ट्रार रेवतीप्रसाद सापकोटाले एआईले पत्रकारको पेसा खोस्ने नभई सहयोगीको रूपमा काम गर्ने स्पष्ट पारे। इन्टरनेटमा उपलब्ध सूचना एआईले संकलन गर्न सक्ने भए पनि स्थानीय तहका घटनाक्रम, तथ्य, फोटो तथा भिडियो सङ्कलन गर्ने जिम्मेवारी पत्रकारकै रहने उनको भनाइ छ।
उनले देश विकासका लागि नागरिकको बौद्धिक क्षमतामा लगानी अपरिहार्य रहेको उल्लेख गर्दै सिंगापुर, दक्षिण कोरिया, चीन र अमेरिकाले नागरिकको ‘ब्रेन’ मा लगानी गरेर प्रगति गरेको उदाहरण प्रस्तुत गरे। सञ्चार कहिल्यै समाप्त नहुने प्रक्रिया भएकाले असल कम्युनिकेटर बने पत्रकारिता सङ्कटमा नपर्ने उनको भनाइ छ।
तालिममा पत्रकारितामा एआईको आधारभूत अवधारणा, समाचार सङ्कलन, लेखन, सम्पादन तथा तथ्य जाँचमा एआईको प्रयोगसम्बन्धी सैद्धान्तिक र व्यवहारिक अभ्यास गराइएको थियो। साथै एआई प्रयोग गरेर फोटो, भिडियो, अडियो तथा विभिन्न भिजुअल सामग्री कसरी तयार गर्न सकिन्छ भन्ने विषयमा पनि प्रशिक्षण दिइएको थियो।
तालिमको सहजीकरण गोरखापत्र दैनिकका उपसम्पादक अजय आचार्य र अडियो–भिडियो भिजुअल इन्डलेस सोलुसनका अध्यक्ष शिव पुरीले गरेका थिए।
