मन्थली सामुदायिक खानेपानी तथा सरसफाइ उपभोक्ता समितिको २३औँ साधारण सभा तथा ८औँ अधिवेशनबाट निर्वाचित पदाधिकारी तथा सदस्यहरूले आइतबार शपथ ग्रहण गर्दै औपचारिक रूपमा जिम्मेवारी सम्हालेका छन्। समितिमा अध्यक्षसहित अधिकांश पदाधिकारी तथा सदस्य निर्विरोध निर्वाचित भएका हुन्।
जिल्ला सदरमुकाम मन्थली नगरपालिका वडा नं १ र २ का केही भागमा खानेपानी वितरण गर्दै आएको समितिको अध्यक्षमा पूर्णबहादुर सुवेदी दोस्रो कार्यकालका लागि निर्विरोध निर्वाचित भएका छन्। यस्तै, उपाध्यक्षमा यमबहादुर बुढाथोकी, महासचिवमा ढकालबहादुर थापा, सचिवमा शान्ता न्यौपाने ९सुवेदी० र कोषाध्यक्षमा कुमार घिमिरे निर्विरोध चयन भएका छन्।
नवनिर्वाचित पदाधिकारी तथा सदस्यहरूलाई निर्वाचन समितिका प्रमुख लक्ष्मण भुजेलले मन्थली नगरपालिका वडा नं १ का वडा अध्यक्ष होमप्रसाद पौडेल ९रामहरि० को उपस्थितिमा समितिको भवनमा आयोजित समारोहमा शपथ खुवाएका हुन्। शपथ ग्रहण समारोहमा बोल्दै भुजेलले सामूहिक एकतालाई शक्तिमा बदल्दै पारदर्शी, उत्तरदायी र प्रभावकारी रूपमा काम गर्न आग्रह गरे।
समितिका सदस्यहरूमा एरिया नं १ बाट दिनेश सुवेदी, एरिया नं २ बाट दामोदरप्रसाद घिमिरे, एरिया नं ३ बाट टेकबहादुर श्रेष्ठ, एरिया नं ४ बाट दीपक भट्ट, एरिया नं ५ बाट श्यामकुमार श्रेष्ठ, एरिया नं ६ बाट शंकरबहादुर थापा र एरिया नं ७ बाट रामकुमार श्रेष्ठ निर्वाचित भएका छन्। तीमध्ये एरिया नं १ का सदस्य दिनेश सुवेदी भने मतदान प्रक्रियामार्फत निर्वाचित भएका एकमात्र सदस्य हुन्। उनले प्रतिस्पर्धीलाई १० मतले पछि पार्दै सदस्य पद हात पारेका हुन्।
समितिको विधान तथा सञ्चालन प्रणालीलाई समयानुकूल परिमार्जन गर्दै महिलाहरू पनि नेतृत्वदायी भूमिकामा सक्षम छन् भन्ने सन्देश दिन खुला महिला सदस्यको संख्या बढाइएको छ। सोहीअनुसार कविता श्रेष्ठ, बिनता काफ्ले र रिता ढुंगेल खुला महिला सदस्यमा निर्विरोध निर्वाचित भएका छन्।
यस्तै, समितिको आर्थिक तथा व्यवस्थापकीय पारदर्शिता सुनिश्चित गर्न गठन गरिएको अधिकार सम्पन्न लेखा समितिको संयोजकमा दीपक दाहाल निर्विरोध निर्वाचित भएका छन्। लेखा समितिका सदस्यहरूमा रामचन्द्र अधिकारी र निलराज जैसी चयन भएका छन्।
सुख्खाग्रस्त क्षेत्रको पहिचान बोकेको मन्थलीमा खानेपानीको दिगो आपूर्ति, आर्थिक अनुशासन र प्रभावकारी व्यवस्थापनमार्फत उपभोक्ताको विश्वास जित्ने गरी काम गर्ने प्रतिबद्धता नवनिर्वाचित समितिले व्यक्त गरेको छ।
