रामेछाप । रामेछापको खाँडादेवी गाउँपालिका–४ रजगाउँ, माडी मुहानस्थित भित्री सडकखण्डमा शुक्रबार दिउँसो भएको सुमो दुर्घटनामा दुई जनाको ज्यान गएको छ। रजगाउँबाट मन्थलीतर्फ आउँदै गरेको ना।१ ज ५५५८ नम्बरको सुमो करिब ५० मिटर तल खसेपछि चालकसहित आठै जना यात्रु घाइते भएका थिए।
घाइतेमध्ये मन्थली नगरपालिका–३ की ५३ वर्षीया गीतामाया जोगीको मन्थली अस्पतालमा उपचारका क्रममा साँझ ७ बजे मृत्यु भएको प्रहरीले जनाएको छ। त्यस्तै मन्थली नगरपालिका–२ तल्लो कठजोरकी ४० वर्षीया हितमाया श्रेष्ठलाई काठमाडौँको बिएण्डबी अस्पताल पुर्याइएको भए पनि अस्पतालले भर्ना प्रक्रियाकै क्रममा मृत घोषणा गरेको जिल्ला प्रहरी प्रमुख डिएसपी भोला भट्टले जानकारी दिए।
दुर्घटना भएलगत्तै जिल्ला प्रहरी कार्यालय रामेछाप र इलाका प्रहरी कार्यालय खाँडादेवीबाट खटिएको प्रहरी टोलीले स्थानीयवासीको सहयोगमा सबै घाइतेलाई उद्धार गरी मन्थली अस्पताल ल्याएको डिएसपी भट्टले बताए।
दुर्घटनामा घाइते भएकामध्ये मन्थली नगरपालिका–२ तल्लो कठजोरकी १४ वर्षीया सञ्चिता श्रेष्ठ, मन्थली–३ की ७० वर्षीया तिलमाया श्रेष्ठ, ५० वर्षीया कृष्णमाया खड्का, ५५ वर्षीया कोपिला जोगी, ७८ वर्षीया चेतकुमारी श्रेष्ठ र ४९ वर्षीय चालक रमेश बुढाथोकीको मन्थलीमा प्राथमिक उपचारपछि काठमाडौंका विभिन्न अस्पतालमा रेफर गरिएको छ। दुर्घटनाको कारणबारे प्रहरीले थप अनुसन्धान जारी राखेको जनाएको छ।
