रामेछाप । खाँडादेवी गाउँपालिका–६ माकादुमस्थित ऐतिहासिक र धार्मिक महत्व बोकेको रुद्रेश्वर महादेव मन्दिर परिसरमा शनिबारदेखि सार्वजनिक संगीतसहितको श्रीमद्भागवत सप्ताह ज्ञान महायज्ञ सुरु भएको छ।
श्रीमद्भागवत मूल समारोह समितिका अध्यक्ष मनोज बुढाथोकीको अध्यक्षतामा आयोजित उद्घाटन समारोहका प्रमुख अतिथि प्रमुख जिल्ला अधिकारीले दीप प्रज्वलन गर्दै महायज्ञको औपचारिक शुभारम्भ गर्नुभयो।
उद्घाटनको क्रममा प्रमुख जिल्ला अधिकारीले रामेछापको सांस्कृतिक पहिचानका रूपमा चिनिने रुद्रेश्वर महादेव मन्दिरको संरक्षण र प्रवर्द्धनमा स्थानीय समुदायले खेलेको भूमिकाको प्रशंसा गर्नुभयो। उहाँले धार्मिक कार्यहरूले समाजमा नैतिकता, एकता र आस्थाको भावना बलियो बनाउने भन्दै महायज्ञको सफलताको शुभकामना दिनुभयो।
कार्यक्रममा खाँडादेवी गाउँपालिकाका निवर्तमान अध्यक्ष प्रेम तमाङ, वडा नं। ६ का अध्यक्ष नारायण कार्की, धार्मिक अगुवाहरू, समाजसेवी र स्थानीय बासिन्दाहरूको उपस्थिति थियो। वक्ताहरूले रुद्रेश्वर महादेव मन्दिरलाई धार्मिक पर्यटनको केन्द्रका रूपमा विकास गर्न यस्ता कार्यक्रमले महत्वपूर्ण योगदान पुर्याउने विश्वास व्यक्त गरे।
सात दिनसम्म सञ्चालन हुने श्रीमद्भागवत सप्ताह ज्ञान महायज्ञमा पण्डित अर्जुनप्रसाद दाहालले कथा वाचन गर्दै हुनुहुन्छ। कथा वाचनसँगै हरेक दिन साँझ भजन–कीर्तन, प्रवचन र सांगीतिक कार्यक्रमहरू आयोजना गरिनेछ।
श्रीमद्भागवत मूल समारोह समितिका अनुसार, महायज्ञबाट संकलित रकम रुद्रेश्वर महादेव मन्दिरको संरक्षण, विकास र प्रचार–प्रसारमा प्रयोग गरिनेछ।
महायज्ञको प्रारम्भ विभिन्न धार्मिक झाँकीसहितको भव्य कलश यात्राबाट गरिएको थियो। सहभागीहरू परम्परागत पोशाकमा सजिएर सहभागी बनेको कलश यात्राले सम्पूर्ण क्षेत्रलाई धार्मिक उत्सवको रंगमा रंग्याएको थियो ।
