रामेछाप नगरपालिकाको वार्षिक प्रगति समिक्षा कार्यक्रम आइतबार सम्पन्न भएको छ । गत आर्थिक वर्ष २०८१÷८२ मा नगरपलिकाले हासिल गरेका उपलब्धि, चुनौति र भावी योजना बारे छलफल गर्दै कार्यक्रम सम्पन्न भएको हो ।
कार्यक्रमको उद्घाटन जिल्ला समन्वय प्रमुख चिना खड्काले गर्नु भएको थियो । सो अवसरमा उहाँले सीमित स्रोतसाधन र विविध चुनौतिका बीच नगरले हासिल गरेका प्रगति देखेर आफूलाई निकै खुशी लागेको बताउँदै जनप्रतिनिधि र कर्मचारीको मिहिनेतको प्रशंसा गर्नु भयो । जिसस प्रमुख खड्काले धेरै महत्वकांक्षी नभइ जनतको आधारभूत आवश्यकता र अपेक्षाहरु पुरा गर्नुपर्ने जोड दिदैँ यस्ता कामलाई प्रभावकारी बनाउन कुनै कसर बाँकी राख्न नहुने बताउनु भयो ।
पालिकाले प्रस्तुत गरेको बार्षिक प्रगति पुस्तिका अनुसार गत बर्ष कुल ७६ करोड ८८ लाख ६९ हजार ५ सय ५१ बजेटमा ६३ करोड ८७ लाख ६१ हजार ८ सय ४५ खर्च भएको छ। जसमा चालु खर्च तर्फ ५० करोड ५० लाख ४३ हजार ६ सय ६ को बजेटमध्ये ८९.४८ प्रतिशत अर्थात् ४४ करोड १८ लाख ५ हजार ८७६ खर्च भएको छ। भने २६ करोड ३८ लाख २५ हजार ९४५ को पुँजीगत बजेटमध्ये ७६.६५ प्रतिशत अर्थात् १९ करोड ६९ लाख ५५ हजार ९३८ खर्च भएको प्रगति विवरण पुस्तिकामा उल्लेख छ । पालिकाको गत बर्ष एक करोड ३० लाख २६ हजार ४ सय २८ रुपैयाँ राजश्व संकलन गरेको छ ।
कार्यक्रममा नगरको विषयगत शाखाहरु प्रमुखहरुले गत वर्ष भएका प्रगति विवरण प्रस्तुत गरेका थिए । कार्यक्रमममा नगरप्रमुख लबश्री न्यौपानेले विकास निर्माण र सेवा प्रवाहलाई थप प्रभावकारी बनाइने उल्लेख गर्दै जनताको सहयोगले नै उपलब्धिहरु हासिल गर्न सम्भव हुने बताउनु भयो । उहाँले बालिकाले गरेका राम्रा कामको मुल्याङकन गर्न जनताले हिच्किचाउन नहुने बताउदै जनताले दिएको साथ र हौसला नै उपलब्धि हासिल गर्न मुख्य स्रोत र शक्ति रहेको जानकारी दिनु भयो ।
कार्यक्रममा नगर उपप्रमुख बालकुमारी कार्कीले प्रविधि र बिधीको उपयोग गर्दै नगरलाई समृद्दिको बाटोमा लैजाँदै गर्दा आइपरेका चुनौतिलाई परास्त गर्न र उपलब्धिहरु हासिल गर्न सफल भएकामा गौरवाम्भित हुनुपर्ने बताउनु भयो । कार्यक्रममा सोधिएका प्रश्नको जवाफ दिँदै प्रमुख प्रशाकीय अधिकृत भोलाप्रसाद चापागाईले आफ्नो प्रसासनिक नेतृत्वको नगर कर्मचारीबाट त्रुटिरहित कार्यसम्पादन भएको जिकिर गर्दै यसलाई निरन्तरता दिदैँ थप सक्रियता बढाइने उल्लेख गर्नु भयो । प्रमुख प्रसाकीय अधिकृत चापागाईँले नगरमा बेथिति र अनियमितताको कुनै कण समेत नरहेको बताउदैँ जनताहरुको जीग्यासा र सुझावहरुले थप सचेत बनाएको समेत बताउनु भयो ।
कार्यक्रममा राजनीतिक दलका प्रमुख एवं प्रतिनिधिले राजनीतिको आँखाले हेर्दा नगरमा कुनै प्रश्न गर्ने ठाउँ नरहेको बताएका थिए । आफ्ना पार्टी, पराई पार्टी सबैलाई समान नजरले सबै ठाउँमा समान विकास गर्न सफल भएकोमा उनीहरुले नगरको प्रंससा गरेका थिए ।
