मन्थली । मन्थली नगरपालिका–१ मा रहेको मन्थली माध्यमिक विद्यालयले कक्षा ११ को भर्ना प्रक्रिया सुरु गरेको छ । विशेषतः विज्ञान संकायमा भर्नाका लागि विद्यालयले विशेष तयारी थालेको हो । विद्यालयका प्रधानाध्यापक डा. टंक प्रसाद दहालका अनुसार विज्ञान शिक्षा क्षेत्रमा विद्यालयले पछिल्लो समय उल्लेखनीय प्रगति गर्दै आएको बताएका छन् ।
उनले विद्यालयमा पढेका विद्यार्थीहरूले एसईई परीक्षामा निरन्तर राम्रो नतिजा ल्याइरहेको बताएका छन् । साथै उत्कृष्ट नतिजा ल्याएका विद्यार्थीहरूको आकर्षण विज्ञान संकायमै देखिएको समेत बताए । विगतका वर्षमा जस्तै यस वर्ष पनि विद्यालयका थुप्रै विद्यार्थीले जिपिए ४ सहित ए पलस ल्याउन सफल भएको जनाएको छ । अभिभावक, शिक्षक र सरोकारवालाहरूले पनि यस उपलब्धिलाई विद्यालयको व्यवस्थापन, शैक्षिक गुणस्तर र समर्पित शिक्षकहरूको योगदानको नतिजा भएको भन्दै खुशि ब्यक्त गरेका छन् ।
कार्यक्रममा विद्यालयले कक्षा ५, ८ र १० मा अध्यापन गराउने ३४ जना शिक्षकहरूलाई नगद सहित सम्मान पत्र द्धवारा सम्मान समेत गरेको थियो । शिक्षकहरूको मेहनत र निरन्तरता नै विद्यार्थीको सफलता पछाडिको मुख्य कारण भएको भन्दै उनीहरूको योगदानको उच्च मूल्याङ्कन गरिएको बिद्यालयले जनाएको छ ।

यस अवसरमा विद्यालयको भौतिक संरचना, पूर्वाधार र सेवा सुविधा बारे पनि जानकारी गराइएको थियो । विज्ञान संकायलाई थप प्रभावकारी बनाउने उद्देश्यले प्रयोगशाला सुधार, डिजिटल शिक्षण प्रणाली, छात्रवृत्ति योजना लगायतका विषयमा विद्यालयले चर्चा गरेको छ ।
कार्यक्रममा मन्थली नगरपालिकाका महाशाखा प्रमुख हेमन्त बुढाथोकी, पूर्व नगरप्रमुख रमेशकुमार बस्नेत, वडा नं. १ का अध्यक्ष हेमबहादुर पौडेल, राजनीतिक दलका प्रतिनिधि, छिमेकी विद्यालयका प्रधानाध्यापक, पत्रकार, शिक्षक, अभिभावक तथा विद्यार्थीहरूको उल्लेखनीय उपस्थिति रहेको थियो ।
कार्यक्रममा सहभागी सरोकारवालाहरूले मन्थली माध्यमिक विद्यालय विज्ञान शिक्षाको स्थानीय केन्द्र बन्दै गएको बताउँदै त्यसलाई अझ सुदृढ गर्न सामूहिक प्रयास आवश्यक रहेको धारणा राखेका थिए ।
विद्यालयले भर्ना प्रक्रिया सुरु भएसँगै इच्छुक विद्यार्थी र अभिभावकहरूलाई आवश्यक जानकारी लिन विद्यालयमा सम्पर्क गर्न आग्रह समेत गरेको छ ।