काठमाडौं । बौद्ध नयाँ बस्तीबाट डेढ करोड रुपैयाँ भन्दा बढी नगद सहित एक चिनियाँ नागरिक पक्राउ परेका छन् । प्रहरीले स्रोत नखुलेको १ करोड ४४ लाख रुपैयाँ सहित चिनियाँ नागरिक वाङ जियानलाई आइतबार राति नियन्त्रणमा लिएको हो ।
जिल्ला प्रहरी परिसर, काठमाडौंका अनुसार वाङको डेरामा राति १० बजेतिर छापा मार्दा ठूलो मात्रामा नगद फेला परेको थियो । प्रारम्भिक अनुसन्धानमा वाङले आफू बोधिचित्त माला खरिद गर्न नेपाल आएको बताएका छन्। प्रहरीका अनुसार बोधिचित्त खरिदको सिजन चलिरहेको भए पनि सो रकमको स्पष्ट स्रोत नखुलेपछि उनलाई नियन्त्रणमा लिइएको हो ।
जिल्ला प्रहरी परिसरका एसपी अपिलराज बोहोराले वाङले बोधिचित्तको माला किन्न आएको दाबी गरे पनि रकम हुण्डी कारोबारबाट आएको हुनसक्ने अनुमान गरिएको जानकारी दिए । उनका अनुसार, “उनी अहिले नियन्त्रणमा छन्, रकमको स्रोत पुष्टि हुन बाँकी छ ।”
पक्राउ परेका वाङ जियान डेढ महिना अघि मात्र भिजिट भिसामा नेपाल आएका थिए र भिसा विजनेसमा परिवर्तन गर्ने तयारीमा रहेको बताइएको छ । प्रहरीले जिल्ला अदालत काठमाडौंबाट म्याद लिई विस्तृत अनुसन्धान गरिरहेको छ।
तिब्बती धर्मगुरु दलाई लामाले करिब एक दशकअघि बोधिचित्तको आध्यात्मिक महत्वबारे प्रवचन दिएपछि यसको माग चीनमा तीव्र रुपमा बढेको छ। त्यसयता नेपालका तामाङ समुदायको धार्मिक र वनस्पतिक महत्व बोकेको बोधिचित्त माला महँगो मूल्यमा बिक्री हुने वस्तुमा परिणत भएको छ। विशेषतः रसुवा, नुवाकोट र तिमाल क्षेत्रका बोधिचित्त स्रोतमा अवैध संलग्नता बढेको आरोपसमेत लाग्दै आएको छ ।
हाल पक्राउ परेका वाङ जियानको संलग्नता पनि यस्तै सञ्जालसँग जोडिएको हुनसक्ने आशंकामा प्रहरी अनुसन्धान तीव्र बनाइएको छ । रकमको स्रोत खुल्ने वा अन्तर्राष्ट्रिय सञ्जाल सँग सम्बन्ध देखिए थप कानुनी कारवाही अघि बढाइने प्रहरीले जनाएको छ।