काठमाडौं । रसुवामा मंगलबार बिहान आएको भीषण बाढीले मानवीय र भौतिक दुवै क्षेत्रमा ठूलो क्षति पु¥याएको छ । प्रहरी प्रधान कार्यालयका अनुसार बाढीमा परी हालसम्म ९ जनाको ज्यान गइसकेको छ भने १९ जना अझै बेपत्ता रहेका छन् ।
बेपत्ता हुनेमध्ये दुई जना प्रहरी, ६ जना चिनियाँ नागरिक र ११ जना सर्वसाधारण रहेको प्रहरीले जनाएको छ । हालै फेला परेका एक शवसहित प्रारम्भिक रूपमा बेपत्ता २० जना मध्ये १९ को खोजी भइरहेको छ । फेला परेका शव रामेछापको लिखु तामाकोशी गाउँपालिका–४ निवासी प्रहरी सहायक निरीक्षक (असई) लालबहादुर श्रेष्ठ रहेको प्रहरीले जनाएको छ । श्रेष्ठको शव चितवनको १५ किलोस्थित त्रिशूली नदी किनारमा भेटिएको हो ।
बाढीबाट प्रभावितहरूलाई उद्दार गर्न ३८३ जना प्रहरी परिचालन गरिएको छ भने हालसम्म ५७ जनाको सकुशल उद्धार गरिएको प्रहरी प्रवक्ता डिआइजी विनोद घिमिरेले जानकारी दिए ।
प्राकृतिक विपत्तिले रसुवाको भौतिक पूर्वाधारमा पनि ठूलो क्षति पु¥याएको छ । नेपाल–चीन सिमाना स्थित मितेरी पुल बगाएको छ भने २४ कन्टेनर, ६ ट्रक र ३५ वटा विद्युतीय सवारी साधन (ईभी) बगाएका छन् । साथै, रसुवा गढी जलविद्युत् आयोजनाको ड्याममा क्षति पुगेको छ र भन्सार कार्यालयको यार्ड समेत डुबानमा परेको छ ।
बाढीले धुञ्चे–टिमुरे सडक खण्ड पूर्णरूपमा अबरुद्ध बनाएको छ । लगातारको वर्षासँगै आएको बाढी र पहिरोका कारण सञ्चार तथा यातायातमा समेत समस्या देखिएको छ । सरकारले उद्धार र राहत कार्यलाई तीव्र पारिएको बताएको छ । मौसम विभागले अझै केही दिन भारी वर्षा हुने सम्भावना रहेको भन्दै सतर्कता अपनाउन आग्रह गरेको छ ।