सिन्धुली — गोलन्जोर गाउँपालिकाले चालु आर्थिक वर्ष २०८१/८२ को सुरुदेखि हालसम्म सञ्चालनमा रहेका विकास निर्माण र सेवा प्रवाहसम्बन्धी गतिविधिबारे सार्वजनिक सुनुवाइ कार्यक्रम सम्पन्न गरेको छ।
आइतबार सम्पन्न कार्यक्रममा गाउँपालिकाका प्रमुख प्रशासकीय अधिकृत चन्द्रकान्त चौधरीले पालिकाले प्रवाह गरिरहेको सेवा र विकास योजनाबारे प्रस्ट जानकारी दिनुभयो। कार्यक्रममा उपस्थित नागरिकहरूले विभिन्न प्रश्नहरू उठाएका थिए, जसको प्रत्यक्ष जवाफ गाउँपालिका अध्यक्ष शंकरराज बराल र उपाध्यक्ष ज्वाला प्रसाद न्यौपानेले दिनुभयो।
अध्यक्ष बरालले नागरिकका सुझाव र गुनासोलाई स्वागत गर्दै जुनसुकै बेला जनताले आफ्ना कुरा राख्न सक्ने वातावरण रहेको बताउनुभयो। “समृद्ध पालिका बनाउन सबैको साथ र सहयोग अपरिहार्य छ,” उहाँले भन्नुभयो, “हामी निर्वाचित भएयता जनअपेक्षा अनुसारका कामहरूलाई प्राथमिकतामा राखेर अघि बढिरहेका छौँ।”
बरालले सकारात्मक सोच र सुझावले विकासमा टेवा पुग्ने भन्दै अनावश्यक नकारात्मकता फैलाउन नहुने धारणा राख्नुभयो। उहाँका अनुसार विकासका कार्यहरू जनचासो र आवश्यकताका आधारमा अघि बढाइएका छन्।
उपाध्यक्ष न्यौपानेले गोलन्जोर गाउँपालिका समृद्ध बनाउन सबैले आ–आफ्नो स्थानबाट जिम्मेवारीपूर्वक सहयोग गर्नुपर्ने बताउनुभयो। नागरिकको विश्वास र सहभागिताले मात्र पारदर्शी र उत्तरदायी प्रशासन सम्भव हुने धारणा उहाँले राख्नुभयो।
कार्यक्रममा वडा अध्यक्षहरू, राजनीतिक दलका प्रमुख एवं प्रतिनिधिहरू, पत्रकार, गाउँपालिका कर्मचारीसहित स्थानीयबासीको उपस्थिति थियो। कार्यक्रमले पालिका र जनताबीचको सम्बन्ध थप प्रगाढ बनाएको सहभागीहरूले बताएका छन्।
