काठमाडौं । नेपाली कांग्रेसका उपसभापति विश्वप्रकाश शर्माले पार्टीभित्रको व्यक्तिगत सम्बन्ध र निष्ठाभन्दा संस्था, सिद्धान्त र पार्टीप्रतिको निष्ठालाई प्राथमिकता दिनुपर्ने बताएका छन् ।
शुक्रबार ललितपुरको सानेपास्थित नेपाली कांग्रेसको केन्द्रीय कार्यालयमा बसेको केन्द्रीय कार्यसम्पादन समितिको बैठकमा बोल्दै शर्माले पार्टीभित्र देखिएका भिन्न मत र प्रतिकूलताका बीच पनि संस्थागत एकतालाई बलियो बनाउनुपर्नेमा जोड दिए ।
उनले नेता तथा कार्यकर्ताले व्यक्तिगत सम्बन्धका आधारमा धारणा बनाउनेभन्दा पार्टीको संस्थागत मर्यादा र सिद्धान्तलाई आत्मसात गर्नुपर्ने बताए । पार्टी र देशको हितलाई प्राथमिकतामा राखेर अघि बढ्नुपर्ने उनको भनाइ थियो ।
‘व्यक्ति र संस्थाप्रतिको निष्ठामध्ये चयन गर्नुपर्दा हामीले पार्टी र देशलाई नै प्राथमिकता दिनुपर्छ,’ शर्माले भने, ‘व्यक्तिगत सम्बन्धभन्दा माथि उठेर पार्टीको संस्थागत मर्यादा र सिद्धान्तलाई आत्मसात गर्न म सबै साथीहरूलाई आग्रह गर्दछु ।’
शर्माले पार्टीभित्रको आन्तरिक विषयलाई संयम र परिपक्वताका साथ समाधान गर्नुपर्ने बताए । उनले आफूहरूले जेठ १६ गते नै सातबुँदे लिखित प्रस्ताव नेताहरू समक्ष पठाएको उल्लेख गर्दै त्यसलाई पार्टीको आन्तरिक विषय भएकाले तत्काल सार्वजनिक नगरेको स्पष्ट पारे ।
उनका अनुसार पछि जेठ ३१ गते उक्त प्रस्ताव सार्वजनिक गरिएको हो । पार्टीभित्रका मतभेदलाई बाहिर विवादका रूपमा प्रस्तुत गर्नुभन्दा संवाद र संस्थागत प्रक्रियामार्फत समाधान खोज्नुपर्नेमा उनले जोड दिए ।
शर्माले विशेष महाधिवेशनबाट व्यक्त भएको कार्यकर्ताको भावना र दृढताकै आधारमा नेपाली कांग्रेस आगामी दिनमा अझ सुदृढ भएर अघि बढ्ने विश्वास व्यक्त गरे । पार्टीभित्र देखिएका भिन्न मतलाई स्वाभाविक रूपमा लिएर संस्थागत एकतालाई प्राथमिकता दिनुपर्ने उनको भनाइ थियो ।
यसैगरी, गत वैशाख ४ गते सर्वोच्च अदालतको डिभिजन बेन्चले निर्वाचन आयोगको अद्यावधिकलाई सदर गर्दै रिट खारेज गरेपछिको परिस्थितिलाई कसैको जित वा हारका रूपमा लिन नहुने शर्माले बताए । उनले अदालतको निर्णयपछि पार्टीलाई थप एकताबद्ध र संस्थागत रूपमा अघि बढाउनुपर्ने धारणा राखे ।
उपसभापति शर्माले विशेष महाधिवेशनबाट निर्वाचित नेतृत्वप्रति आफ्नो विश्वास कायमै रहेको बताए । गगन थापाको नेतृत्वमा नेपाली कांग्रेसले आगामी दिनमा सबल राष्ट्रिय शक्तिको भूमिका निर्वाह गर्नेमा आफू पूर्ण रूपमा दृढ रहेको उनको भनाइ थियो ।
पार्टीभित्रको सुदृढ एकताले मात्रै कांग्रेसलाई बलियो बनाउने र कांग्रेस बलियो हुँदा मुलुकको लोकतान्त्रिक प्रणालीसमेत थप मजबुत हुने शर्माले बताए । उनले नेता तथा कार्यकर्तालाई व्यक्तिगत आग्रह–पूर्वाग्रहभन्दा माथि उठेर पार्टीको सिद्धान्त, संस्था र देशको हितलाई केन्द्रमा राख्न आग्रह गरे ।
