हेटौँडा । बागमती प्रदेशका मुख्यमन्त्री इन्द्रबहादुर बानियाँलाई विश्वासको मत लिनुअघि नै आफ्नै पार्टीभित्रबाट गम्भीर दबाब परेको छ। पूर्वमुख्यमन्त्री बहादुर सिंह लामाले आफ्नो पक्षका तीन जना सांसदलाई मन्त्रिपरिषदमा समेट्नुपर्ने अडान राखेका कारण बानियाँको विश्वासको मत प्रक्रिया जटिल बन्दै गएको हो।
लामाको नेतृत्वमा रहेका नेपाली कांग्रेसका १४ सांसदले पूर्वसहमति अनुसार गोविन्द लम्साल, गीता गुरुङ र माया श्रेष्ठलाई मन्त्री बनाउनुपर्ने माग गरेका छन्। सहमति कार्यान्वयन नभए सामूहिक राजीनामा दिने वा विश्वासको मतमा असमर्थन जनाउने रणनीति लामापक्षले अघि सारेको छ।
मुख्यमन्त्री बानियाँले साउन २७ गते विश्वासको मत लिने तयारी गरेका छन्। तर, पार्टीको संसदीय दलभित्र दुई धार स्पष्ट देखिँदै गएको छ। बानियाँ हाल काठमाडौँमा पार्टीका शीर्ष नेतासँग भेटघाट गरी अनुकूल परिस्थिति बनाउन लबिङमा छन् भने लामा पनि काठमाडौँमै रहेर आफ्ना पक्षका सांसदहरूसँग बैठकमा व्यस्त छन्।
कांग्रेसका सांसद उत्तम जोशीका अनुसार सहमति कार्यान्वयन र सरकारको भविष्यबारे छलफल भइरहेको छ। “राजीनामा भन्दा पनि पार्टीको निर्देशन पालना गर्नुपर्ने हो,” उनले भने, “तर सहमति कार्यान्वयन अनिवार्य छ।” सांसद तीर्थ लामाले पनि पार्टी नेतृत्वको निर्णयलाई प्राथमिकता दिनुपर्ने बताए।
प्रदेश सभाको ११० सदस्यीय संरचनामा सरकार जोगाउन ५६ मत आवश्यक छ। एमालेका २७ मत बानियाँको पक्षमा पक्का मानिए पनि कांग्रेसभित्रका १४ मत अनिश्चित बनेका छन्। यदि यी सांसदले असमर्थन जनाए वा फ्लो क्रस गरे, बानियाँको सरकार ढल्ने जोखिम उच्च रहनेछ।
