काठमाडौं । विशेष महाधिवेशनबाट निर्वाचित गगनकुमार थापाको नेतृत्वको नेपाली कांग्रेस केन्द्रीय कार्यसमितिले उक्त महाधिवेशन विधानसम्मत र वैधानिक भएको ठहर गर्दै निर्वाचन आयोगसँग औपचारिक मान्यता माग गरेको छ ।
उपसभापति विश्वप्रकाश शर्माको नेतृत्वमा केन्द्रीय कार्यसमितिका पदाधिकारी तथा सदस्यहरू निर्वाचन आयोग पुगेर पार्टी विधानको व्यवस्था स्पष्ट पारेका हुन् । उनीहरूले कांग्रेस विधानको धारा १७ को उपधारा (२) अनुसार विशेष महाधिवेशन अनिवार्य र बाध्यकारी व्यवस्था भएको दाबी गरेका छन् ।
उपसभापति शर्माले विधानअनुसार ५४ दशमलब ५८ प्रतिशत महाधिवेशन प्रतिनिधिले विशेष अवस्था देखाउँदै विशेष महाधिवेशन माग गरेको तर तत्कालीन केन्द्रीय कार्यसमितिले प्रतिनिधिको सार्वभौम अधिकार प्रयोग गर्न नदिएपछि दुई महामन्त्रीले विधानकै प्रावधान प्रयोग गरी विशेष महाधिवेशन आह्वान गरिएको जानकारी दिए । सोही अनुसार पुस २७ देखि ३० गतेसम्म विशेष महाधिवेशन सम्पन्न भई पार्टीको नीति र नेतृत्व दुवै परिवर्तन भएको उनले बताए ।
उनका अनुसार विशेष महाधिवेशनले गगनकुमार थापाको नेतृत्वमा नयाँ केन्द्रीय कार्यसमिति चयन गरेको छ, जसलाई विधानसम्मत प्रक्रिया अनुसार मान्यता दिनु निर्वाचन आयोगको दायित्व हुने उल्लेख गरिएको छ ।
यसै क्रममा अर्का उपसभापति पुष्पा भुसालले पनि निर्वाचन आयोगका पदाधिकारीहरूलाई विशेष महाधिवेशन पार्टी विधानले दिएको अधिकार प्रयोग गरी बोलाइएको स्पष्ट पारिन् । उनले विशेष महाधिवेशनबाट निर्वाचित केन्द्रीय कार्यसमितिको विवरण शीघ्र अद्यावधिक गरी औपचारिक मान्यता प्रदान गर्न आग्रह गरिन् ।
कांग्रेस केन्द्रीय कार्यसमितिले विशेष महाधिवेशन सम्पूर्ण रूपमा वैधानिक, विधिसम्मत र महाधिवेशन प्रतिनिधिको सार्वभौम अधिकारको प्रयोग भएको भन्दै आयोगबाट सकारात्मक निर्णयको अपेक्षा गरेको जनाएको छ ।
