पूर्वमन्त्री तथा नेपाली कांग्रेस धादिङ जिल्ला कार्यसमितिका सभापति रामनाथ अधिकारीले नेपाली कांग्रेसको विशेष महाधिवेशन सफलतापूर्वक सम्पन्न भएको बताउँदै अब पार्टी सम्पूर्ण रूपमा आगामी निर्वाचनमा केन्द्रित हुनुपर्ने धारणा व्यक्त गरेका छन्।
विशेष महाधिवेशनपछि प्रतिक्रिया दिँदै सभापति अधिकारीले पार्टीभित्र चलेका बहस, मतभिन्नता र असहमतिहरू लोकतान्त्रिक अभ्यासको स्वाभाविक प्रक्रिया भएको उल्लेख गरे। उनका अनुसार ती सबै विचार–मन्थनबाट पार्टीले परिपक्व र सकारात्मक निष्कर्ष निकालेको छ, जसले कांग्रेसलाई नयाँ दिशातर्फ अघि बढ्न मार्गप्रशस्त गरेको छ।
कांग्रेस नेता शेखर कोइराला निकट मानिने अधिकारीले विशेष महाधिवेशनले नीति, नेतृत्व र संगठनात्मक संरचनामा आवश्यक सुधारको बाटो खोलेको बताए। उनले सभापतिमा निर्वाचित गगनकुमार थापा नेतृत्वको टिमलाई बधाई दिँदै पार्टी एकताका साथ अघि बढ्नुपर्ने आवश्यकता औंल्याए।
अधिकारीद्वारा जारी विज्ञप्तिमा नेपाली कांग्रेस नेपालको लोकतन्त्र, जनअधिकार, नागरिक स्वतन्त्रता, संवैधानिक सर्वोच्चता, विधिको शासन र उदार अर्थनीतिको संस्थापक तथा संरक्षक पार्टी भएको उल्लेख गरिएको छ। लोकतान्त्रिक राष्ट्रशक्तिको रूपमा कांग्रेसले समय र जनभावनाअनुसार आफूलाई रूपान्तरण गर्दै देश र जनताको हितमा समर्पित हुनुपर्ने दायित्व रहेको विज्ञप्तिमा जनाइएको छ।
विज्ञप्तिमा गत भदौ २३ गते भ्रष्टाचारको अन्त्य, सुशासन र अभिव्यक्ति स्वतन्त्रताको पक्षमा जेन–जेङ ९जेन्जी० तथा नवयुवा पुस्ताले गरेको आन्दोलनको भावनालाई आत्मसात गर्दै पार्टीभित्र नीति र नेतृत्व परिवर्तनको एजेन्डासहित विशेष महाधिवेशन सम्पन्न गरिएको उल्लेख छ। उक्त महाधिवेशनबाट नयाँ नीति निर्माण र नेतृत्व चयन भएको जनाउँदै जिल्ला कार्यसमितिले यसलाई सकारात्मक र ऐतिहासिक कदमको रूपमा लिएको जनाएको छ।
धादिङ जिल्ला कार्यसमितिले पार्टीका क्रियाशील सदस्य, क्षेत्रीय प्रतिनिधि, भातृ तथा शुभेच्छुक संस्थाका इकाइ, टोल तथा वडा कार्यसमिति, गाउँ तथा नगर कार्यसमिति, प्रदेश र जिल्ला तहका पदाधिकारी, महाधिवेशन तथा प्रदेश अधिवेशन प्रतिनिधिहरूलाई संगठन विस्तार, सुदृढीकरण र सक्रियताका साथ अगाडि बढ्न आह्वान गरेको छ।
साथै आगामी फागुन २१ गते हुने प्रतिनिधिसभा सदस्य निर्वाचनमा पार्टी र पार्टीले तय गर्ने उम्मेदवारको पक्षमा जनताको बीचमा केन्द्रित भई लाग्न जिल्ला कार्यसमितिले अपिल गरेको छ।
