काठमाडौं । राजनीतिमा पुनः सक्रिय हुन थालेकी पूर्वराष्ट्रपति विद्यादेवी भण्डारीले काठमाडौंको थापागाउँस्थित लाखेचौर मार्गमा सम्पर्क कार्यालय उद्घाटन गरेकी छन्। भाडामा लिइएको घरमा आज दिउँसो २ बजे कार्यक्रममार्फत कार्यालयको औपचारिक उद्घाटन हुने छ ।
पूर्वराष्ट्रपति भण्डारी पक्षले यसलाई सम्पर्क कार्यालय नभई ‘मदन भण्डारी ७५ औं जन्मजयन्ती मूल व्यवस्थापन समिति’को कार्यालय भनेको छ। उक्त समितिको संयोजक बागमती प्रदेशका पूर्वमुख्यमन्त्री डोरमणि पौडेल रहेका छन् भने संरक्षकमा विद्यादेवी भण्डारी स्वयं छिन्।
मदन भण्डारीको ७५औं जन्मजयन्तीका अवसरमा गठित ७५ सदस्यीय समितिले वर्षभर जनताको बहुदलीय जनवाद (जबज) र भण्डारीका विचारबारे विभिन्न विमर्श कार्यक्रम गर्ने तयारी जनाएको छ। तर, एमालेले भण्डारीलाई पुनः राजनीतिमा फर्कन रोक लगाउने र उनको पार्टी सदस्यता नवीकरण नगर्ने निर्णयपछि समितिको गतिविधि फरक अर्थमा व्याख्या हुन थालेको छ।
भण्डारी निकट नेताहरूका अनुसार, यो कार्यालयलाई सम्पर्क कार्यालयको रूपमा पनि प्रयोग गरिनेछ र यसमार्फत एमालेभित्रको अन्तरसंघर्ष सम्बद्ध गतिविधि अघि बढाइनेछ। अझ रोचक कुरा के छ भने, अहिले लिइएको यही घरबाट २०४८ सालमा मदन भण्डारीले आफ्नो चुनावी अभियान सञ्चालन गरेका थिए। त्यसै घरबाटै मदन भण्डारीको रहस्यमय निधनपछि भएको उपनिर्वाचनमा विद्या भण्डारीले समेत चुनावी अभियान चलाएकी थिइन्।
राजनीतिक विश्लेषकहरू भन्छन्, पुरानो राजनीतिक स्मृतिसँग जोडिएको यो घरलाई सम्पर्क कार्यालयका रूपमा प्रयोग गरिनु केवल संयोग मात्र नभई एमालेभित्र बढ्दो खिचातानीबीच भण्डारी पक्षको रणनीतिक कदम हो।
