रामेछाप । रामेछाप नगरपालीका वडा नं ३ साँघुटारमा वडाध्यक्ष सहितका जनप्रतिनिधिहरुको मिलेमतोमा डोजरको प्रयोग हुँदै आएको नेपाली कांग्रेसले आरोप लगाएको छ । वडामा विगत ३ वर्ष देखि सडक लगायत निर्माणका कामहरु विना प्रतिस्पर्धा वडाध्यक्ष लगायत वडा समितिका पदाधिकारीहरुको स्वार्थ अनुकुल एउटै स्काईभेटरले काम गर्दै आएको आरोप नेपाली काँग्रेसले लगाएको हो ।
पछिल्लो पटक त्यसैलाई निरन्तरता दिंदै लिखु करिडोर अन्र्तगत साँघुटार सिरिसे सडक खण्डका लागि प्रदेश साँसद विकास कोषबाट प्राप्त २० लाख रुपैयाँको काम पनि विना प्रतिस्पर्धा यस अघि वडा कार्यालयले प्रयोग गर्दे आएको स्काईभेटरलाईनै दिने तय भएपछि आफुहरुले प्रतिस्पर्धाका आधारमा कम मुल्यमा काम गर्ने स्काईभेटरलाई काम दिनका लागि लिखित रुपमा वडा कार्यालयमा निबेदन दिएको नेपाली काँग्रेस साँघुटारका ईकाई सभापति मनोज खड्काले बताए ।
यस अघि वडा कार्यालय बाट हुने हरेक निर्माणका काममा सोहि स्काईभेटरबाट काम हुने गरेको भएपनि त्यतिबेला प्रतिस्पर्धाका लागि अन्य मेसिन नआएकोले आफुहरुले यसबारेमा केहि नभनेको खड्काले बताए । अहिले फेरी सडकको लागि आएको २० लाख रुपैयाका लागि पनि वडा अध्यक्ष भुपाल श्रेष्ठ संगकै मिलेमतोमा उपभोक्ता समितिले प्रति घण्टा ४ हजार ५ सय रुपैयाँमा काम गर्ने स्काईभेटर तयार हुँदा हुँदै प्रति घण्टा ५ हजार रुपैयाँमा काम गर्ने गरि पुरानै स्काईभेटरले काम गर्न तयारी गरेपछि आफनो पार्टि उक्त बद्मासिका विरुद्ध उत्रन बाध्य भएको पनि सभापति खड्काले बताए ।
खड्काका अनुसार – वडा अध्यक्षले आफुहरुको लिखित गुनासोको सम्बोधन गर्नुको साटो तपाईहरुले जे सक्नु हुन्छ गर्नाेस कहाँ जानु पर्छ जानुस,यहाँका जनतालाई मैले राम्ररी चिनेको छु । काम भनेको पुरानै मेसिनले गर्नै भन्दै धम्किको भाषा प्रयोग गर्नु भयो । उक्त निबेदन उपर अध्यक्षले आईतबार सम्म पनि कुनै चासो नदिएर वे वास्ता गरेको आरोप पनि खड्काले लगाए । उक्त मेसिनले स्थानिय हिमगंगा माविको जमिन सम्मयाउँदा प्रति घण्टा ४ हजार ५ सय रुपयाँमा काम गरेको नजिर हुँदा हुँदै नगर र वडाको बजेटको काम भने प्रति घंण्टा ५ हजारका दरलेनै गर्दे आएको खड्काको भनाई रहेको छ ।
यस बारेमा वडाध्यक्ष भुपाल श्रेष्ठ संग सम्पर्क गर्दा उहाँले वडा कार्यालयमा निबेदन दिन आएको स्वीकार गर्दे आफु ब्यस्त भएकोले त्यसबारेमा आफुले आईतबार वडा कार्यालयमा छलफल गराउने जिम्मा वडा सदस्यलाई दिएको बताए । घटेर काम गर्ने भन्ने कुरा जानकारीमा आएको भएपनि रामेछाप नगरपालीकाका अरु वडाको तुलनामा हामिले कम रेटमा काम गरेको उदाहरण भएको बताए । अन्य वडाले प्रति घंटा ६ हजार देखि ६ हजार ५ सय सम्ममा डोजर लगाएका छन् । तर अहिले सम्म प्रति घंण्टा ५ हजारमानै काम गरेर नगर भरिमा आफुहरुले सस्तो मुल्यमा उदाहरणिय काम गरेको वडा अध्यक्षले दावि गरे ।