रामेछाप । आगामी मंसिर ४ गते हुने प्रतिनिधिसभा सदस्य निर्वाचनमा नेपाली काँग्रेस रामेछापले दर्बिलो उम्मेदवार नपाउँदा गएको स्थानिय तह निर्वाचनमा वडामा पराजित भएका नारायण बहादुर बोगटीलाई उम्मेदवार बनाउने गरि पार्टीले केन्द्रमा नाम सिफारिस गरेको छ ।
नेपाली काँग्रेस रामेछापको शनिवार बसेको कार्यसमितिको बैठकले वडामा चुनाव हारेका बोगटीलाई प्रतिनिसभामा उठाउने गरि नाम सिफारिस गरेको हो । बोगटी गएको स्थानिय तहको चुनावमा मन्थली नगरपालिका वडा नं ३ कठजोरवाट वडा अध्यक्षमा उम्मेदवार वनेका थिए । उनले ४ सय ८८ मत ल्याएर निर्वाचनमा पराजित भएका थिए । उनीसँगै निर्वाचनमा होमिएका नेकपा एमालेका कृष्णगोपाल थापाले ७ सय ५४ मत प्राप्त गरी निर्वाचित भएका थिए ।
नेपाली काँग्रेस रामेछापको १३ औं अधिवेशनमा सचिवमा पदमा उम्मेदवार वनेर पराजित वनेका बोगटी पुनः पार्टीको १४ औं अधिवेशनमा नेता कृष्णवहादुर महतको प्यानलवाट सचिव पदमा उम्मेदवार बनेपनि पराजित भएका थिए । पार्टी सचिवमा पटक–पटक पराजित वनेका उनलाई पूर्णवहादुर तामाङ (कान्छाराम) पार्टी सभापति हुने बित्तिकै कार्यालयमा राखेको पार्टीको पहिलो वैठकमा नै सदस्य पदमा मनोनित गरेका थिए ।
सदस्य पदमा मनोनित बनेका बोगटीलाई केही महिनापछि नै पार्टी सभापति तामाङले पुनः भिरपानीको सित्खामा भएको पाँचौ वैठकबाट पार्टी प्रवक्ताको समेत जिम्मेवारी दिएका थिए । पार्टी सभापति तामाङले पार्टीभित्र कुनै सरसल्लाह नै नगरी बोगटीलाई प्रवक्ताको जिम्मेवारी दिएको भन्दै सचिव लगाएतका बहुमत सदस्यले बैठक बहिस्कार समेत गरेका थिए ।
पार्टीको प्रवक्ताको जिम्मेवारी सम्हालेकै समयमा बोगटी स्थानिय तहको निर्वाचनमा वडा अध्यक्षमा भिडेका थिए । वडा अध्यक्षमा पराजित भएपछि नैतिकताको आधारमा पार्टी प्रवक्ताको जिम्मेवारी छोड्लान भन्ने धेरै काँग्रेसका नेता तथा कार्यकर्ताहरुले अपेक्षा गरेका थिए । तर उनले पार्टी प्रवक्ताको जिम्मेवारी छाडेनन् ।
पार्टीको पटक–पटक भएको अधिवेशन र गएको स्थानिय तह निर्वाचनमा समेत पराजित बनेका बोगटीलाई पुनः पार्टी सभापति तामाङले प्रतिनिधिसभा सदस्य पदमा सिफारिस गरेको भन्दै नेपाली काँग्रेस पार्टी भित्र चौतर्फी रुपमा बिरोध शुरु भएको छ । पार्टीमा लामो समयदेखी त्याग र तपस्या गरेर काम गर्दै आएका हनोहार नेताहरु हुँदाहुँदै ती नेताको पक्षमा टीकटको लागि सिफारिस गर्नुभन्दा पार्टी सभापतिले आफ्ना आसेपासेलाई सिफारिस गरेको एक नेताले जानकारी दिए । उनले भने– पार्टीका जिम्मेवार व्यक्तिले नै लाज पचाएपछि कसको के लाग्दो रहेछ र !
मंसिर ४ गते हुने निर्वाचनको लागि जिल्लावाट प्रतिनिधिसभा र प्रदेश सभा तथा समानुपातिक तर्फ जाने उम्मेदवारको निर्विवाद ढङ्गले सर्वसम्मत रुपमा उम्मेदवार टुङ्याउनु पर्नेमा उम्मेदवार टुङ्याउन नसक्नु पार्टीका जिम्मेवार पदाधिकारीको कमजोरी भएको नेपाली काँग्रेस रामेछापका पार्टी सचिव दीपक खड्काले जानकारी दिए ।
उनले भने– अहिले ज–जसले प्रदेश सभा, प्रतिनिधिसभामा उम्मेदवारी दिएका छन् ती व्यक्तिहरुले पुन ः आगामी वर्षमा हुने स्थानिय तहको निर्वाचनमा नैतिकताको आधारमा उम्मेदवार वन्न नमिल्ने सचिव खड्काले बताए ।
