लक्षुमण खड्का
रामेछाप । जिल्ला प्रहरी कार्यालय रामेछापले वडा अध्यक्ष मानबहादुर सुनुवारलाई नियन्त्रणमा लिएको छ । उमाकुण्ड गाउँपालिका–४ का वडा अध्यक्ष मान बहादुर सुनुवारलाई आइतवार प्रहरीले नियन्त्रणमा लिएको हो । सुनुवारले दोहोरो नागरिकता उपलब्ध गराउन जिल्ला प्रशासन कार्यालयलाई सिफारीस गरेको भन्दै प्रहरीले नियन्त्रणमा लिएको हो ।
वडा अध्यक्ष सुनुवारले उमाकुण्ड गाउँपालिका–४ प्रितीकी निर्मला बस्नेतलाई नाम परिवर्तन गरी पुन: दोश्रो पटक नागरिकता बनाउन वडावाट सिफारिस दिएका थिए । निर्मलाले यस अघि नै जिल्ला प्रशासन कार्यालय रामेछापवाट नागरिकता लिइ सकेकी थिइन । पुन: बस्नेतले आफ्नै बहिनीको स्कुलको सर्टिफिकेटको आधारमा वडावाट सिफारिस लिएर दोहोरो नागरिकता लिन जिल्ला प्रशासन कार्यालय रामेछापमा कागजात पेश गरेकी थिइन ।
जिल्ला प्रशासन कार्यालय रामेछापले वस्नेतले पेश गरेको कागजको आधारमा कार्यालयमा भएको रेकर्ड भिडाउँदा यसअघि नै नागरिकता लिइसकेको देखेपछि शंका गरी उनीसँग सोधपुछ गर्दा दोहोरो नागरिकता लिन खोजेको देखिएपछि प्रशासनले कागजात नियन्त्रणमा लिएको थियो । प्रशासनले वस्नेतको नागरिकताका लागि सिफारिस गर्ने वडा अध्यक्षलाई नियन्त्रणमा लिन निर्देशन दिए पछी अध्यक्ष सुनुवारलाई नियन्त्रणमा लिएको जिल्ला प्रहरी कार्यालय रामेछापका प्रहरी नायव उपरीक्षक राजकुमार थिङले जानकारी दिए ।
उनले भने– दोहोरो नागरिकताको सिफारिस दिने वडा अध्यक्षलाई प्रहरी हिरासतमा राखेर थप अनुसन्धान भोली गर्ने जनाएको छ । भरखर प्रहरी कार्यालयमा ल्याइ पुर्याएकोले अनुसन्धान भोलीमात्र हुने प्रहरी नायव उपरीक्षक राजकुमार थिङले जानकारी दिए । वडा अध्यक्षले भने पहिला उक्त महिलाले नागरिकता लिएको जानकारी आफुलाई थाहा नभएको बताएका छन् । यस अघि वडा सचिब पदम कुमारी बस्नेत, दोहोरो नागरिकता नाम परिवतन गरी लिन खोज्ने निर्मला बस्नेत र उनकी आमा प्रहरी नियन्त्रणमा रहेको छ ।
