रामेछाप । जिल्लाको मन्थली नगरपालिका वडा न.–९ पुरानागाउँका वडा अध्यक्ष गोकर्णराज आरणले खाली कागजमा हस्ताक्षर गर्दै नागरिकलाई दिने गरेको फेला परेको छ । आरणले खाली कागजमा हस्ताक्षर गर्दै दिँदा गाउँका सोझा नागरिकहरू सेवा बाट वञ्चित हुन परेका छन् ।
गाउँका सोझा नागरिकलाई अध्यक्ष आरणले खाली फारममा हस्ताक्षर गरेर दिँदा नागरिकले सही तरिकाले विवरण भर्न नजान्दा र कहाँ बुझाउने र कुन कार्यालयमा पेस गर्ने, कसलाई भेटेर दिने भन्ने उल्लेख नहुँदा नागरिकले समस्या झेल्दै आएका छन् । वडा अध्यक्ष आरणले आ.व २०७९÷०८० मा समेत खाली कागजमा हस्ताक्षर गर्दा केही नागरिकले पाउने सामाजिक सुरक्षा भत्ता बाट वञ्चित भएका थिए । सोही अनुसार यस वर्ष पनि खाली कागजमा हस्ताक्षर गर्दै आफूहरूलाई वडा अध्यक्ष आरणले दुःख दिने गरेको वडाका नागरिकहरूको आरोप रहेको छ ।
वडा अध्यक्ष आरणले भने– मैले कुनै पनि नागरिकलाई खाली कागजमा हस्ताक्षर गरेर दिएको छैन । हामीले खाली कागज पत्रमा हस्ताक्षर गर्न मिल्दैन र गर्दा पनि गर्दैनौँ यो आरोप मात्र हो । अध्यक्ष आरणले आफूले कार्यालयको छाप र हस्ताक्षरको दुरुपयोग नगरेको दाबी गरे पनि उनले खाली कागजमा हस्ताक्षर गरी छापको दुरुपयोग गरेको कागज फेला परेको छ ।
