काठमाडौं, २२ भदौ । वैदेशिक रोजगारीको लहर चलेकै बेला बागलुङका दुई युवा भने स्वदेशमै उद्यमशीलताको बाटो रोज्दै उद्योग स्थापनामा होमिएका छन्। काठेखोला गाउँपालिका–७ रेशका तीर्थ गौतम र तारा शर्माले एक करोड रुपैयाँभन्दा बढी लगानी गरेर साबुन उद्योग सञ्चालनमा ल्याएका हुन्।
स्नाकोत्तर अध्ययन सकेर साथीभाइ विदेशिन थाले पनि तीर्थ र ताराले त्यसको विकल्प रोजेनन्। परिवारका सदस्यहरूले समेत ‘देशमै केही गरेर भविष्य सुरक्षित हुन्छ र?’ भन्ने प्रश्न उठाए। तर उनीहरू आफ्नो सोचमा अडिग रहे। अन्ततः गाउँमै बसेर उद्योग सुरु गर्ने उनीहरूको सपना २०८० सालमा साबुन उत्पादनमार्फत साकार भएको हो। अहिले उनीहरू दुई वर्षे छोरासहित उद्योगलाई विस्तार गर्ने योजनामा व्यस्त छन्।
टिएण्डटी म्यानुफ्याक्चरिङ नाम दिइएको यो उद्योगबाट हाल छ जनाले रोजगारी पाएका छन्। उद्योगले उत्पादन गर्ने ‘कालिका साबुन’ बागलुङका गलकोट, बुर्तिबाङ, कुश्मिसेरा र बरेङका बजारमा मात्र होइन, म्याग्दी र पर्वतसम्म आपूर्ति भइसकेको छ। सुरुमा ५० लाख रुपैयाँ लगानी गरेर दर्ता गरिएको उद्योग हाल एक करोडभन्दा बढी पूँजीसहित सञ्चालनमा छ।
उद्योगका सञ्चालक तारा शर्माले यो यात्रा सजिलो नभएको स्वीकार्छिन्। उनी भन्छिन्, “विदेश जाने लहर त छ तर हामीले आफ्नै ठाउँमा केही गर्नुपर्छ भन्ने सोच बनायौँ। नयाँ कामको सुरुआत आफैंबाट गर्नुपर्छ भन्ने मान्यता राखेर हामी अघि बढेका हौँ। यस उद्योगले गाउँकै स्थानीयलाई रोजगारी दिन थालेको छ।”
सञ्चालक तीर्थ गौतमले आवश्यक कच्चा पदार्थ प्रायः भारत र केही काठमाडौंबाट ल्याउनुपर्ने बताउँछन्। वार्षिक करिब ५० लाख रुपैयाँ बराबरको कारोबार हुने उद्योगले दुई सय ग्राम तौलको कपडा धुने साबुनलाई ५० रुपैयाँमा बिक्री गर्दै आएको छ। उनका अनुसार उत्पादनमा मात्र नभई गुणस्तरमा पनि विशेष ध्यान दिइएको छ।
आगामी वर्षहरूमा साबुनसँगै सरफ, हार्पिक र कुलिनजस्ता सरसफाइ सामग्री पनि उत्पादन गर्ने योजना रहेको उद्योगले जनाएको छ। स्वदेशमै स्वरोजगार सिर्जना गर्ने उद्देश्यले सुरु गरिएको यो उद्योगले वैदेशिक रोजगारीमा निर्भर रहनुपर्ने बाध्यता केही हदसम्म कम गर्ने विश्वास सञ्चालक जोडीले लिएका छन्।
