२४ साउन, काठमाडौं । भारतको उत्तराखण्डमा आएको भीषण बाढीमा परेर हराएका १३ जना नेपाली नागरिकको सकुशल उद्धार गरिएको छ। दिल्लीस्थित नेपाली दूतावासलाई भारतीय अधिकारीहरूले उद्धार कार्यको जानकारी दिएका हुन्।
उद्धार भएकामध्ये वीरेन्द्र कामु, प्रशंसा शाह, कोमल शाह, रमन शाह (श्रीमान्–श्रीमती र छोरा), दिनेश र गंगा (श्रीमान्–श्रीमती), सूर्य शाही, प्रविण सिंह, नवराज बोहोरा, गणेशबहादुर शाही, राज बहादुर शाही, दिपेन्द्र शाही र नरेन्द्र शाही रहेका छन्। तीन जना हरिद्वार जाँदै गर्दा बाढीमा अड्किएका थिए भने अन्य उतै स्थायी रूपमा बसोबास गर्दै आएका थिए।
गत बुधबार दिउँसो आएको बाढीमा परेर एक सयभन्दा बढी बेपत्ता भएका छन् भने पाँच जनाको मृत्यु भइसकेको भारतीय सञ्चारमाध्यमहरूले जनाएका छन्। उत्तरकाशी जिल्लाको धराली बजारमा सबैभन्दा ठूलो क्षति भएको छ। समुद्री सतहबाट करिब ३ हजार १०० मिटरको उचाइमा अवस्थित धराली चारधाम यात्रा मार्गमा पर्ने स्थान हो, जहाँबाट गंगोत्री करिब २० किलोमिटर टाढा छ।
सुदूरपश्चिमका धेरै नेपालीहरू रोजगारीका लागि त्यही क्षेत्रमा जाने गरेकाले बाढीमा परेकामध्ये नेपालीहरूको संख्या उल्लेख्य रहेको दूतावासले जनाएको छ। प्रारम्भिक तथ्यांक अनुसार, बाढीमा परेर कम्तीमा २२ जना नेपाली बेपत्ता भएका थिए। उद्धार गरिएका १३ जनालाई सुरक्षित स्थानमा पुर्याइएको छ भने बाँकी ९ जनाको खोजी कार्य अझै जारी छ।
