रामेछाप । उमाकुण्ड गाउँपालिकाले आयोजना गरेको ‘अन्तरपालिका खुल्ला फुटबल प्रतियोगिता’ सम्पन्न भएको छ । शनिवार सम्पन्न खेलमा पुरुष तर्फ चण्डेश्वरी यूथ क्लब प्रिती (उमाकुण्ड) र महिला तर्फ ओखलढुङ्गाको खिजीदेम्बा गाउँपालिकाले जित हात पारेको छ ।
पुरुष तर्फको उपाधि मन्थलीको आकाशे ब्वाइज क्लबलाई टाइब्रेकरमा ४–२ गोलको अन्तरले हराउँदै चण्डेश्वरी यूथ क्लब प्रिती (उमाकुण्ड) विजेता भएको छ भने महिला तर्फ ओखलढुङ्गाको खिजीदेम्बा गाउँपालिकाले उमाकुण्ड ४ प्रीतिलाई ३–० को सोझो सेटमा हराउँदै उपाधि हातपार्न सफल भएको छ । पुरुष तर्फ जित हात पार्दै चण्डेश्वरी यूथ क्लब प्रितीले नगद १ लाख ३० हजार सहित ट्रफी, मेडल र प्रमाणपत्र प्राप्त गरेको छ भने महिला तर्फ खिजीदेम्बा गाउँपालिकाले जित हात पार्दै नगद ५० हजारसहित ट्रफि, मेडल र प्रमाणपत्र प्राप्त गरेको छ ।
गएको वैशाख २३ गते देखि २७ गतेसम्म भएको खेलमा पुरुष तर्फ उपविजेता बनेको आकाशे ब्वाइज क्लब मन्थलीले ९० हजार नगदसहित ट्रफी, मेडल र प्रमाणपत्रमा चित्त बुझाएको छ । त्यस्तै गरी सेमिफाइनलमा प्रवेश गर्ने दुई टिमहरू हिल भ्यू एफसी रामेछाप र मिलन चोक यूथ क्लब प्रीतिले ३० हजार नगद सहित ट्रफी, मेडल र प्रमाणपत्र प्राप्त गरेको आयोजकले जनाएको छ । त्यस्तै, महिला तर्फ उपविजेता प्रिती–४ ले नगद ४० हजार सहित ट्रफी, मेडल र प्रमाणपत्र प्राप्त गरेको छ ।
महिला तर्फ तृतीय र चौथो बनेका उमाकुण्ड ४ प्रिती र चण्डेश्वरी यूथ क्लब प्रीतिले क्रमशः नगद २०–२० हजार सहित ट्रफी, मेडल र प्रमाणपत्र प्राप्त गरेको पालिकाको शिक्षा शाखाले जानकारी दिए । गएको सोमबार देखि सुरु भएको प्रतियोगितामा पुरुष तर्फ आकाशे ब्वाइज क्लब मन्थलीका रामकृष्ण माझी र महिला तर्फ उमाकुण्ड ४ प्रीतिका साने वाइवा सर्वोकृष्ट खेलाडी घोषित भएका छन् । उनीहरूले क्रमशः नगद रु ५ र ३ हजारसहित ट्रफी प्राप्त गरेका छन् ।
त्यस्तै पुरुष तर्फ सर्वाधिक गोलकर्ता आकाशे ब्वाइज क्लब मन्थली कै करण खड्का र महिला तर्फ ओखलढुङ्गाको खिजिदेम्बा गाउँपालिकाकी निशा कुमारी मगर सर्वाधिक गोलकर्ता घोषित भएकी छिन् । पुरुष तर्फका गोलकर्ताले ३ हजार र महिला तर्फका गोलकर्ताले नगद २ हजारसहित ट्रफि प्राप्त गरेका छन् ।
पुरुष तर्फ उत्कृष्ट गोलकिपर तथा खेलको म्यान अफ दि म्याच चण्डेश्वरी यूथ क्लबका निशान थापा मगर घोषित हुँदै खेलाडीहरूले रु ३ हजार नगद सहित ट्रफी र म्यान अफ दि म्याच हुने खेलाडीले नगद रु २ हजार प्राप्त गरेका छन् ।
विजेता खेलाडीहरूलाई पालिकाका अध्यक्ष शेरबहादुर सुनुवार, उपाध्यक्ष सावित्री सुनुवार, प्रमुख प्रशासकीय अधिकृत जितबहादुर श्रेष्ठ, वडा अध्यक्षहरू तथा राजनीतिक दलका प्रतिनिधि लगायतको भव्य उपस्थितिमा नगद पुरस्कार राशिसहित ट्रफी, मेडल र प्रमाणपत्र प्रदान गरे । उनले खेलकुदलाई पालिकाले अभिन्न अंगको रूपमा लिएको धारणा राख्दै अनुशासित र मर्यादित खेलाडीहरू उत्पादनमा जोड् दिएको बताए । उमाकुण्ड गाउँपालिकाको प्रायोजन, ४ नं वडा कार्यालयको सह–प्रायोजन तथा उमाकुण्ड गाउँपालिका खेलकुद विकास समितिको आयोजना र ४ नं वडा खेलकुद विकास समितिको व्यवस्थापनमा सम्पन्न प्रतियोगितामा पुरुष तर्फ ९ टिम र महिला तर्फ ४ टिमको सहभागिता रहेको थियो ।
महिला तर्फ उत्कृष्ट गोलकिपर भुजीकी झरना नगरकोटी र स्थानीय राइजिङ खेलाडीमा चण्डेश्वरी यूथ क्लबकी गोलकिपर सलिना खुलाल घोषित भएका छन् । उनीहरूले क्रमशः रु २ हजार नगदसहित ट्रफी प्राप्त गरेका छन् ।