रामेछाप — ‘योग सिकौँ, योग सिकाऔँ’ भन्ने मूल नारासहित रामेछापको उमाकुण्ड गाउँपालिकामा योग शिक्षक तालिम सुरु भएको छ। गाउँपालिकाको आयोजना र नेपाल योग इन्स्टिच्युट एण्ड रिट्रिट काठमाडौँको प्राविधिक सहयोगमा आइतबारबाट सुरु भएको तालिम असार २८ गतेसम्म सञ्चालन हुनेछ।
गाउँपालिका क्षेत्रका जनप्रतिनिधि, शिक्षक, स्वास्थ्यकर्मी र कर्मचारी गरी ३० जनाको सहभागिता रहेको तालिमको उद्घाटन गाउँपालिका अध्यक्ष शेरबहादुर सुनुवारले गर्नुभयो। कार्यक्रम उमाकुण्ड गाउँपालिकाका प्रमुख प्रशासकीय अधिकृत अभिजित सुनुवारको अध्यक्षतामा सुरु भएको हो।
तालिममा प्रशिक्षक बालकृष्ण खलाल र भीमप्रसाद आचार्यले योग अभ्यास, ध्यान, शारीरिक तथा मानसिक स्वास्थ्य प्रवर्द्धन र तनाव व्यवस्थापनबारे प्रशिक्षण दिइरहेका छन्।
उद्घाटन कार्यक्रममा बोल्दै प्रशासकीय प्रमुख सुनुवारले तालिमबाट प्राप्त ज्ञानलाई समुदायमा विस्तार गर्न सहभागीहरूलाई आग्रह गर्नुभयो। विशेषगरी मानसिक तनावबाट पीडित व्यक्तिहरूलाई लाभ पुग्ने गरी शिक्षक र स्वास्थ्यकर्मीहरू सक्रिय हुनुपर्ने उहाँको भनाइ छ।
गाउँपालिका अध्यक्ष शेरबहादुर सुनुवारले सकारात्मक सोच र जीवनशैली विकास गर्न तालिम आयोजना गरिएको बताउनुभयो। उहाँका अनुसार चालु आर्थिक वर्ष २०८१/८२ मा तालिमका लागि गाउँपालिकाले ३ लाख ५० हजार रुपैयाँ बजेट विनियोजन गरेको थियो।
