उद्योग वाणिज्य संघ दोलखाको १६ औँ जिल्ला अधिवेशनबाट नयाँ नेतृत्व चयन भएको छ। निर्वाचन उप–समितिले सार्वजनिक गरेको अन्तिम मतपरिणाम अनुसार अध्यक्ष पदमा सनत थापा ४६२ मत प्राप्त गरी विजयी हुनुभएको छ। उहाँका निकटतम प्रतिद्वन्द्वी दिनेश पाठकले ३५९ मत प्राप्त गर्नुभएको थियो।
अध्यक्षसँगै थापा प्यानलका अधिकांश उम्मेदवारहरूले निर्वाचनमा बाजी मारेका छन्। वरिष्ठ उपाध्यक्षमा प्रविण श्रेष्ठ (४४९ मत), उपाध्यक्षमा विवेक कुमार खत्री (४४२ मत), महिला उपाध्यक्षमा कल्पना श्रेष्ठ (५०० मत) र महासचिवमा सुरेश उप्रेती (४९७ मत) निर्वाचित हुनुभएको छ। यस्तै सचिवमा अनिल रिजाल, कोषाध्यक्षमा रामशरण बस्नेत, दलित सदस्यमा प्रकाश नेपाली र महिला सदस्यमा पार्वती भण्डारी शर्मा विजयी हुनुभएको छ।
शाखा सदस्यहरूमा मागादेउरालीबाट छो नाम्गेल तामाङ र संगटीबाट रिम बहादुर ओली निर्वाचित हुनुभएको छ भने खुला सदस्य पदमा कुमार श्रेष्ठ र राजेश उप्रेतीले सफलता हात पार्नुभएको छ। दोलखाका व्यवसायीहरूको साझा संस्थाको रूपमा रहेको संघको यो नयाँ कार्यसमितिले जिल्लाको आर्थिक र व्यावसायिक विकासमा महत्त्वपूर्ण भूमिका खेल्ने विश्वास लिइएको छ।
