रामेछाप । नेपाल तरुणदल रामेछापले आफ्नो ६८ औं स्थापना दिवसको अवसर पारेर बुधवार जिल्ला सदरमुकाम मन्थलीमा बृहत्त रक्तदान कार्यक्रम आयोजना गरि स्थापना दिवस मनाएको छ ।
जिल्लाका सरकारी तथा सामुदायिक अस्पतालहरुमा भर्ना भएका बिरामीहरुले रगत अभाव झेल्दै आएपछि तरुणदलको स्थापना दिवसको अवसर पारेर संस्थाले नेपाल रेडक्रस सोसाइटी जिल्ला शाखा रामेछापको सहकार्यमा संस्थाले बृहत रक्तदान कार्यक्रमको आयोजना गरेको हो । रक्तदान कार्यक्रममा धेरै नागरिकहरुको उपस्थिती भएता पनि ३८ जनाले मात्रै रगत दान गरेका थिए ।
नेपाल तरुणदलले आयोजना गरेको रक्तदान कार्यक्रममा रगत दान गर्न नेपाल रेडक्रस सोसाइटीको सभाहल मन्थलीमा भेला भएका नेपाल तरुणदल रामेछापका पदाधिकारीहरु, नेपाली काँग्रेसका पदाधिकारीहरु, भातृसंस्थाका पदाधिकारीहरु, महाधिवेशन प्रतिनिधि, प्रदेश महाधिवेशन प्रतिनिधि, जिल्ला स्थित अन्य नागरिकहरु र पत्रकारहरुको समेत उपस्थिती रहेको नेपाल तरुणदल रामेछापका अध्यक्ष काजीबहादुर खड्का (दिनेश)ले जानकारी दिए ।
रक्तदान कार्यक्रममा धेरै नागरिकहरुको उपस्थिती भएता पनि सबैले रक्तदान गर्न पाएनन् । नेपाल रेडक्रस सोसाइटीमा रहेको फ्रिजमा जम्मा ४० पोका मात्रै ब्लड अट्ने भएकाले स्टोरको समस्या हुँदा रक्तदान कार्यक्रममा उपस्थित भएका सबैको रगत संकलन गर्न नसकिएको रेडक्रस सोसाइटी रामेछापले जनाएको छ ।
नेपाल रेडक्रसमा जम्मा भएको रगत जिल्लाका सरकारी अस्पताल, निजी अस्पताल र छिमेकी जिल्ला सिन्धुलीको खुर्कोटमा रहेका अस्पतालहरुले विरामीहरुको लागि रगत लैजाने गरेका छन् । जिल्लामा संकलन गरिएको रगत ३५ दिन भन्दा बढी राख्न नमिल्ने भएकाले पनि सबैको रगत संकलन गर्न नसकिएको नेपाल रेडक्रस सोसाइटी रामेछापका कार्यालय प्रमुख शम्भुकुमार बुढाथोकीले जानकारी दिए ।
यअघि जिल्लाका सरकारी तथा निजी अस्पतालमा उपचार लिन आउने विरामीहरुले रगत खोज्न जिल्ला वाहिरसम्म धाउनु पर्ने वाध्यता रहदै आएको थियो । पछिल्लो समय नेपाल रेडक्रस सोसाइटीले ब्लड बैंक स्थापना गरेर अहिले रामेछापको अलावा छिमेकी जिल्ला सिन्धुली र दोलखाका बिरामीलाई आवश्यक परेको रगत जिल्लामा नै सहज रुपमा उपलव्ध हुँदै आएको छ ।
नेपाल तरुणदल रामेछापले आफ्नो संस्थाको स्थापना दिवसको अवसर पारेर गरेको रक्तदानले धेरै बिरामी परेका नागरिकहरुको ज्यान नै बच्न सक्ने भएकाले संस्थाले धेरै राम्रो र उदाहरणिय काम गरेको नेपाली काँग्रेस रामेछापका प्रदेश महाधिवेशन प्रतिनिधि नारायण भट्टराईले जानकारी दिए ।
