काठमाण्डौं। अमेरिकी राष्ट्रपति डोनाल्ड ट्रम्प नेतृत्वको प्रशासनले हाल अमेरिका प्रवेशका लागि भिसा प्राप्त गरेका करिब ५ करोड ५० लाख विदेशीहरूको विस्तृत छानबिन गर्ने निर्णय गरेको छ ।
अमेरिकी विदेश मन्त्रालयले विज्ञप्ति जारी गर्दै भिसा अवधि सकिएर पनि अमेरिका बसेका, आपराधिक गतिविधि वा आतंकवादसँग संलग्न भएको आशंका लागेका व्यक्तिहरूलाई प्राथमिकताका साथ जाँच गर्ने जनाएको छ । मन्त्रालयका अनुसार प्रहरी प्रशासन तथा अध्यागमन अभिलेखसँगै भिसा जारी भएपछि सार्वजनिक भएका सबै प्रकारका सूचनाको समीक्षा गरिनेछ ।
अवैध आप्रवासीविरुद्ध कठोर नीतिका कारण दोस्रो कार्यकालमा पुनः निर्वाचित भएका ट्रम्पले यसअघि मुख्यतः अवैध आप्रवासीलाई लक्षित गरेका थिए । तर पछिल्लो निर्णयपछि कानुनी रूपमा भिसा लिएर बसिरहेका विदेशीहरू समेत सरकारको निगरानीमा पर्ने भएका छन् ।
सन् २०२४ को आर्थिक वर्षमा मात्र अमेरिकाले स्थायी बसोबास ९‘ग्रीन कार्ड’० बाहेक करिब १ करोड १० लाख व्यक्तिलाई अस्थायी भिसा जारी गरेको थियो । तीमध्ये झन्डै ७७ प्रतिशत व्यवसाय वा पर्यटन प्रयोजनका थिए भने करिब सात प्रतिशत विद्यार्थी र शिक्षाविद्हरूका परिवारलाई जारी गरिएको थियो । कतिपय भिसा दीर्घकालीन हुने भएकाले सबैको छानबिन समय–साध्य र खर्चिलो हुने मन्त्रालयले स्वीकार गरेको छ ।
यसअघि नै ट्रम्प सरकारले भिसावाहकको सामाजिक सञ्जालमार्फत यहूदी विरोधी वा अमेरिका–विरोधी गतिविधि गरेको छ कि भनेर निगरानी सुरु गरिसकेको छ । पछिल्लो निर्णयसँगै आप्रवासीसम्बन्धी जानकारी संकलनको प्रक्रिया अझ तीव्र हुने देखिएको छ ।
विदेश मन्त्री मार्को रुबियोले व्यावसायिक ट्रक चालकहरूका लागि नयाँ भिसा जारी गर्न रोक लगाउने घोषणा गरेलगत्तै यो निर्णय सार्वजनिक गरिएको हो । केही साताअघि मात्र अमेरिकी सरकारले भिसाको म्याद नाघेका र कानुनी प्रावधान उल्लंघन गरेका करिब ६ हजार विद्यार्थीको भिसा खारेज गरेको घोषणा गरेको थियो ।
