काठमाडौँ – अष्ट्रेलियाको नर्दन टेरिटोरीमा जारी टप एन्ड टी–२० सिरिजमा नेपालले लगातार दोस्रो हार बेहोरेको छ। शनिबार भएको खेलमा नेपाल बङ्गलादेश ‘ए’ सँग २९ रनले पराजित भयो।
जितका लागि १८४ रनको लक्ष्य पछ्याएको नेपाल २० ओभरमा ७ विकेट गुमाएर १५४ रनमै रोकियो। नेपालका लागि कुशल मल्लले ४७ बलमा अविजित ५९ रनको अर्धशतक प्रहार गरे पनि टोलीलाई जित दिलाउन सकेनन्।
बङ्गलादेशका बलर रकिबुल हसनले ३ विकेट लिए भने सेफ हसन, रिपोन मन्डल र मृत्युन्जय चौधरीले समान १–१ विकेट झारे। यसअघि टस जितेर ब्याटिङ थालेको बङ्गलादेशले ६ विकेट गुमाउँदै १८३ रन बनाएको थियो। ओपनर जिशाद आलमले सर्वाधिक ७१ रन जोडे भने अफिफ होसेन ४८ रनमा अविजित रहे।
नेपालका लागि रिजन ढकालले २ विकेट लिँदा नन्दन यादव, करण केसी र सन्दीप लामिछानेले समान १–१ विकेट हात पारे। नेपाल यसअघि पहिलो खेलमा पनि एनटी स्ट्राइकसँग पराजित भएको थियो। अब नेपालले मेलबर्न स्टार्स, होबार्ट हरिकेन्स, मेलबर्न रेनेगेड्स र पाकिस्तान शाहीन्ससँग प्रतिस्पर्धा गर्नेछ।
