मेरो प्रदेश डेक्स
मन्थली, भाद्र ९
रामेछापको सुनापति गाउँपालिकाले आयोजना गरेको तिज बिषेश लोक गीत प्रतियोगिता आइतबार सम्पन्न भएको छ ।
तिज पर्वलाई थप रोमाञ्चक र मनोरञ्जनात्मक बनाउन वडा नम्बर ३ को कार्यालय प्राङ्गणमा आयोजित सो कार्यक्रम सम्पन्न भएको हो ।
तिजको सांस्कृतिक पक्षलाई जीवन्त राख्दै महिलाहरुको गायन प्रतिभालाई उजागर गर्न प्रतियोगिता आयोजना गरिएको पालिका उपाध्यक्ष गिता बिष्टले बताइन् ।
प्रतियोगितामा वडा नम्बर २ को मिना महतेको दिदी बहिनी समूह प्रथम भएको छ । सो समुहले १५ हजार रुपैयाँ पुरस्कार प्राप्त गरेको छ
वडा नम्बर ४ को निरुता खड्काको आमा समूहले द्वितीय पुरस्कार १० हजार रुपैयाँ जितेको छ। यस्तै वडा नम्बर ५ को सचेतना आमा समूहले तृतीय भई पाँच हजार रुपैयाँ पुरस्कार प्राप्त गरेको छ।
कार्यक्रममा दुई समूहले सान्त्वना पुरस्कार प्राप्त गर्न सफल भएका छन् । जसमा वडा नम्बर १ को चेतनशील समूहले तीन हजार र वडा नम्बर ३ को सयपत्री आमा समूहले एक हजार रुपैयाँ पुरस्कार पाएका छन् ।
प्रतियोगितामा पाँच वटै वडाका समुह सहभागी भएका थिए । तिजको मौलिकता र सांस्कृतिक पहिचान झल्किने गरी पालिकाले प्रतियोगिता आयोजना गरिएको जनाएको छ ।
