रामेछाप । धेरैजसो विद्यालयहरुमा विद्यार्थीको अनुपातमा शिक्षक नहुँदा विद्यालयमा अध्ययरत बालबालिकाहरुको पठनपाठन प्रभावित भएको कुरा त सुनिएकै हो, तर तीन जना विद्यार्थीलाई तीनै जना शिक्षक रहेको सुन्दा अचम्मै लाग्न सक्छ ।
यस्तै अचम्मको शिक्षक र विद्यार्थी संख्या बराबरी रहेको विद्यालय रामेछाप नगरपालिकावडा नं–३ साँघुटारमा रहेको छ । साँघुटारमा रहेको ककनी आधारभूत विद्यालयलयमा बिगत लामो समयदेखी तीनजना विद्यार्थीहरुलाई तीनजना शिक्षकहरुले एकै कक्षा कोठामा राखेर पढाउँदै आएका छन् । २०५१ सालमा स्थापना भएको उक्त विद्यालयमा शुरुका वर्षहरुमा कक्षा ८ सम्म पढाई हुने गर्दथ्यो ।
पछिल्लो समय गाउँमा रहेका युवायुवती वैदेशिक रोजगारीमा जाने क्रम वढ्दो र गाउँका अभिभावकहरु आफ्ना साना बालबालिकाहरुलाई सदरमुकामका केही निजी विद्यालयमा त केही सुविधासम्मपन्न विद्यालयहरुमा पढाउन शुरु गरेपछि त्यस विद्यालयमा अध्ययन गर्न आउने विद्यार्थीहरुको संख्यामा कमी आएको सो विद्यालयका शिक्षकले बताएका छन् ।
विद्यार्थी नहुँदा अहिले उक्त विद्यालयमा कक्षा ५ सम्म मात्रै पढाई हुँदै आएको छ । विद्यालयमा अध्ययन गर्ने विद्यार्थीहरुको संख्या १५ जना रहेको विद्यालयले जनाएका छन् । तर उक्त विद्यालयमा पत्रकारहरु पुग्दा विभिन्न समुहका तीनजना विद्यार्थीलाई एकै ठाउँमा राखेर शिक्षकले पढाउँदै आएको भेटिएको हो । पत्रकारहरु सो विद्यालयमा पुग्दा अन्य कक्षा कोठामा कुनै पनि विद्यार्थीहरु थिएनन् ।
धेरै वर्ष मेहेनेत गरेर गाउँमा आधारभूत विद्यालय स्थापना गरेको भएता पनि अहिलेको विद्यालयको अवस्था हेर्दा निकै दयनिय बनेको रामेछाप नगरपालिका वडा नं–३ साँघुटारका धनवहादुर खड्काले जानकारी दिए । उनले भने– विद्यालयमा यतिखेर हेर्ने हो भने विद्यार्थीको संख्या र शिक्षक बराबरी छन् । हरेक वर्ष विद्यार्थी भर्ना अभियान अन्तका विद्यालयले चलाउने सुने पनि आफ्नो गाउँको विद्यालयले भने यो अभियानमा खासै चासो नदिदा यस्तो समस्या आएको हुनसक्ने खड्काले बताए ।
रामेछाप नगरपालिका शिक्षा शाखाले पटक–पटक अनुगमन गर्दा सो विद्यालयमा विद्यार्थी संख्या एकदमै कम भएकाले त्यस विद्यालयमा कक्षा घटाउने बिषयमा नगर शिक्षा समितिमा छलफल भइरहेको रामेछाप नगरपालिका शिक्षा शाखाका प्रमुख सुकदेव नेपालले जानकारी दिए । उनले भने– पहिला देखी चलिरहेको विद्यालयको एकै पटक कक्षा घटाउन स्थानिय अभिभावकहरुले नमानेका कारण घटाउन सकिएन । आगामी शैक्षिक सत्र ०७८ साल वैशाख देखी लागु गर्ने गरि कक्षा ३ सम्म मात्रै संचालन गर्ने गरि नगर शिक्षा समितिले काम अघि वढाएको र त्यस विद्यालयका शिक्षकलाई अन्यत्र पदास्थापना गर्ने योजना वनेको शिक्षा प्रमुख नेपालले बताए ।