असार २४ । रामेछापको उमाकुण्ड गाउँपालिकामा नेपाल टेलिकमको सेवा प्रभावहीन बन्दा स्थानीय बासिन्दा, कर्मचारी, शिक्षक तथा सेवाग्राही दैनिक रूपमा सास्ती भोग्न बाध्य भएका छन् । फोन नलाग्ने, लागे पनि आवाज स्पष्ट नसुनिने, सम्पर्क पटक–पटक विच्छेद हुने र कतिपय स्थानमा टावर नै नटिप्ने समस्याले सञ्चार सेवा संकटग्रस्त बनेको स्थानीयको गुनासो छ ।
गाउँपालिकाका वडा नम्बर ७ भुजी, ६ गुप्तेश्वर, ५ र ४ प्रीति तथा ३ कुँबुकास्थलीका अधिकांश क्षेत्रमा नेपाल टेलिकमको सेवा प्रभावकारी नहुँदा स्थानीयले वैकल्पिक रूपमा एनसेलको सिम प्रयोग गर्न थालेका छन् । स्थानीयका अनुसार पछिल्लो समय टेलिकमको नेटवर्क यति कमजोर बनेको छ कि सामान्य फोन सम्पर्क गर्नसमेत निकै कठिन हुने गरेको छ ।
वडा नम्बर ४ प्रीतिस्थित च्यादलु बजारमाथि रहेको नेपाल टेलिकमको टावरबाट समेत आसपासका क्षेत्रमा पर्याप्त सेवा नपुगेको स्थानीयको गुनासो छ । त्यस्तै वडा नम्बर १ गुम्देलमा सोलुखुम्बुको लिखु पिके गाउँपालिकाको छिरिङ खर्कस्थित टावरमा निर्भर रहनुपर्दा मौसम प्रत्यक्ष रूपमा सेवामा असर पर्ने गरेको छ । सौर्य ऊर्जाबाट सञ्चालन हुने टावर घाम लाग्दा मात्र चार्ज हुने र वर्षा तथा बदली हुँदा सेवा पूर्ण रूपमा अवरुद्ध हुने अवस्था रहेको स्थानीय बताउँछन् ।
स्थानीयका अनुसार लिखु खोलामा सञ्चालनमा रहेका जलविद्युत् आयोजनाबाट विद्युत् आपूर्ति हुन नसक्दा टावर अझै सौर्य ऊर्जामै निर्भर छ। त्यसका कारण बर्खायाममा सञ्चार सेवा झनै प्रभावित हुने गरेको छ। आपतकालीन अवस्थामा समेत सम्पर्क हुन नसक्दा नागरिकले ठूलो समस्या झेल्नुपरेको उनीहरूको भनाइ छ ।
पालिकाको केन्द्र च्यादलु, भुजी, गुप्तेश्वरलगायत क्षेत्रमा फोन सेवा अविश्वसनीय बनेपछि सरकारी सेवा प्रवाह, विद्यालयको प्रशासनिक काम तथा दैनिक जनजीवनसमेत प्रभावित भएको स्थानीयले बताएका छन् । उनीहरूले टेलिकमले ग्रामीण क्षेत्रमा रहेका टावरको नियमित मर्मत, स्तरोन्नति र भरपर्दो विद्युत् व्यवस्थापनमा ध्यान नदिँदा वर्षौंदेखि सास्ती खेप्नुपरेको गुनासो गरेका छन् ।
यता नेपाल टेलिकम मन्थली शाखाले भने समस्या समाधान गर्ने अधिकार स्थानीय कार्यालयसँग नभएको जनाएको छ । शाखाका कर्मचारीका अनुसार उमाकुण्ड क्षेत्रबाट पटक–पटक गुनासो आए पनि ती सबै केन्द्रमा पठाउने बाहेक शाखाले प्रत्यक्ष रूपमा समाधान गर्न सक्ने अवस्था छैन । निमित्त प्रमुख प्रदीप कार्कीले प्रभावित नागरिकले सामूहिक रूपमा लिखित माग पेश गरे समस्या समाधानका लागि केन्द्रबाट पहल हुन सक्ने बताएका छन् ।
स्थानीयले भने सञ्चार सेवा आधारभूत आवश्यकता बनिसकेको अवस्थामा नेपाल टेलिकम र सम्बन्धित निकायले तत्काल प्रभावकारी पहल नगरे ग्रामीण बासिन्दाले अझै लामो समयसम्म सञ्चार संकट झेल्नुपर्ने बताएका छन् ।
