काठमाडौँ । पूर्वप्रधानन्यायाधीश सुशीला कार्कीलाई अन्तरिम सरकारको प्रधानमन्त्री नियुक्त गर्ने सहमति जुटेको छ । सहमति अनुसार राष्ट्रपति रामचन्द्र पौडेलले आज राति ९ बजे शीतल निवासमा उनलाई शपथ गराउने भएका छन् ।
राष्ट्रपतिका प्रेस सल्लाहकार किरण पोखरेलका अनुसार कार्कीलाई शपथ गराउने तयारी अन्तिम चरणमा पुगेको छ । यसअघि नयाँ सरकार गठनका लागि कार्कीसहित जेनजी अभियन्ता तथा हामी नेपाल संस्थाका अध्यक्ष सुदन गुरुङ र अधिवक्ता ओमप्रकाश अर्याल राष्ट्रपति निवास पुगेका थिए ।
अन्तरिम सरकार प्रमुखको विषयमा सहमति भए पनि संसद् विघटनबारे छलफल भने अझै टुंगिएको छैन । स्रोतका अनुसार जेनजी अभियन्ताले राष्ट्रपति कार्यालय घेर्ने चेतावनी दिएपछि र सेना प्रमुख अशोकराज सिग्देलद्वारा संकटकालको सम्भावनासम्बन्धी रिपोर्ट आएपछि राष्ट्रपति पौडेल संसद् विघटनबारे आफ्नो अडानबाट पछि हटेका हुन् ।
यसअघि प्रधानमन्त्री केपी शर्मा ओलीले जेनजी आन्दोलनको चर्को दबाबका बीच भदौ २४ गते राजीनामा दिएका थिए । असामान्य परिस्थितिलाई ध्यानमा राख्दै राष्ट्रपति पौडेलले सोही दिन राजीनामा स्वीकृत गरेका थिए । शपथग्रहणपछि नयाँ प्रधानमन्त्री सुशीला कार्कीले मन्त्रिपरिषद् गठन गरेर अन्तरिम सरकार सञ्चालन अघि बढाउनेछन् ।
