२५ भदौ, काठमाडौं । जेनजी आन्दोलनबारे सेनासँग वार्ता चलिरहेको बेला भद्रकालीस्थित जंगीअड्डामा भेला भएका युवाहरूले नेतृत्वप्रति असन्तुष्टि जनाएका छन् । उनीहरूको भनाइमा, आन्दोलनको अगुवाइ पूर्वप्रधानन्यायाधीश सुशीला कार्कीले होइन, बालेन शाह र हर्क साम्पाङ जस्ता युवाले गर्नुपर्ने हो ।
जेनजीको तर्फबाट नेतृत्वमा कार्कीको नाम अगाडि आएको छ । तर, जंगीअड्डामा पुगेको एक समूहले त्यसलाई अस्वीकार गर्दै बालेन–हर्कलाई नै उपयुक्त नेता बताएको हो । उनीहरूले “यो युवा पुस्ताको आन्दोलन भएकाले नेतृत्व पनि युवाकै हातमा हुनुपर्छ” भन्ने माग राखेका छन् ।
बुधबार साँझ जंगीअड्डामा जेनजीका प्रतिनिधि सेनासँग छलफलमा व्यस्त रहँदा आन्दोलनकारी युवाबीच नेतृत्वको विषयमा मतभेद खुलेर देखिएको छ । सेनाले भने जेनजी प्रतिनिधिहरूसँग विभिन्न चरणमा वार्ता अघि बढाइरहेको छ । स्रोतका अनुसार, वार्ताबाट ठोस निष्कर्ष निस्किएपछि मात्र राष्ट्रपतिसँग औपचारिक संवाद सुरु गर्ने तयारी गरिएको छ ।
