रामेछाप । सुनकोसी नदीको धार नै परिवर्तन गरेर रातारात नदी दोहन हुनेक्रम बढेपछि स्थानीय सरकार र प्रशासनले निगरानी बढाउनुको साथै नदीको धार परिर्वतन गर्ने र नदी थुनेर नदीजन्य पदार्थ उत्खनन् गर्नेलाई कारबाही गर्ने जनाएको छ ।
एकसाता अघि रामेछाप र सिन्धुलीको सीमाना मझुवा बगरमा सिन्धुलीतर्फ बगिरहेको नदीको धारनै परिर्वतन गरि रामेछापतर्फ फर्काएर नदीजन्य पदार्थ उत्खनन गरेको भन्दै खाँडादेवी गाउँपालिकाले सो कार्यको आपत्ती जनाउँदै कानुनी कारवाहीको लागि जिल्ला प्रशासन कार्यालय रामेछापलाई अनुरोध गरेको थियो ।
रामेछापको खाँडादेवी गाउँपालिका र सिन्धुलीको सुनकोसी गाउँपालिकाको सिमानामा बहने सुनकोसी नदी किनारामा रहेको वालुवा ढुंगा उत्खननको लागि दुवै गाउँपालिकाहरुले ठेक्का लगाएका छन् । पालिकाहरुको मूख्य आम्दानीको मुख्य स्रोत ढुङ्गा, गिट्टी र वालुवा भएकाले पालिकाको आँखा पनि सोही नदीमा पर्दै आएको छ ।
सिन्धुलीको सुनकोशी गाउँपालिकाबाट ठेक्का पाएका गतिशिल निर्माण सेवाले नदी नै फर्काउने गतिविधि गरेपछि शनिवार दुवै गाउँपालिकाका अध्यक्ष सिन्धुली र रामेछापका प्रमुख जिल्ला अधिकारी, दुवै जिल्लाका प्रहरी प्रमुखको रोहबरमा नदी फर्काउने कार्य तत्काल रोक्ने सहमती भएको हो । दुवै जिल्लाका प्रमुख जिल्ला अधिकारीको रोहवरमा सहमती भएअनुसार रामेछापतर्फ फर्काएको कोशीलाई पुरानै अवस्थामा फर्काउने निर्णय भएको छ । रामेछाप र सिन्धुलीतर्फ वालुवाको ठेक्का लिएका दुवै पक्षले सुनकोसी नदीको बालुवा उत्खनन कार्यमा कानुन विपरीत काम नगर्ने र कुनै पनि विवाद एकआपसमा नगर्ने समझदारी समेत भएको छ ।
दुवै जिल्लाका प्रमुख जिल्ला अधिकारीको रोहवरमा विश्वास कन्ट्रक्सनका प्रोपाइटर शेर बहादुर तामाङ, सोही कन्ट्रक्सनका सञ्चालक केशर बहादुर पौडेल, गतिशिल निर्माण सेवाका सञ्चालक राम बोगटी र सोही कम्पनीका प्रोपाइटर सुशन चौलागाईबीच समझदारी भएको हो । सुनकोशी नदी दोहनको बिषयमा विभिन्न संचारमाध्यममा समाचारहरु आएपछि रामेछापका प्रमुख जिल्ला अधिकारी गौलोचन सैवु, सिन्धुली जिल्लाका प्रमुख जिल्ला अधिकारी सुरेश न्यौपाने, जिल्ला प्रहरी कार्यालय सिन्धुलीका प्रमुख आभुषण तिम्सिना, जिल्ला प्रहरी कार्यालय रामेछापका प्रमुख नवराज ढुंगाना समेतको टोली उक्त स्थान पुगेका थिए ।
सुनकोसी नदीको धार परिर्वतन गरेको बिषयमा विवाद उत्पन्न भएपछि त्यसको समाधान गर्र्न गरिएको छलफल कार्यक्रममा खाँडादेवी गाउँपालिकाका अध्यक्ष प्रेमबहादुर तामाङ, सुनकोसी गाउँपालिकाका अध्यक्ष दिपा बोहोरा सहित अन्य स्थानिय जनप्रतिनिधिहरुको समेत उपस्थिती रहेको थियो ।