रामेछाप । सिन्धुलीको खुर्कोटमा रहेको सुनकोसी सामुदायिक अस्पतालले ओपीजी मेसिन सहित दाँतको विशेष उपचार सुरु गरेको छ । बिहीबार एक कार्यक्रमको आयोजना गरी सुनकोसी सामुदायिक अस्पतालले ओपीजी मेसिन सहित दाँतको विशेष उपचार सुरु गरेको हो ।
रोटरी क्लबले ओपीजी मेसिन हस्तान्तरण गरे सँगै बिहीबार देखी औपचारिक रूपमा सिन्धुलीको खुर्कोटमा रहेको सुनकोसी अस्पतालले शिविर सञ्चालन गरी दन्त सेवा सुरु गरेको छ । अस्पतालले बिहीबार सञ्चालन गरेको निःशुल्क शिविरमा २९ जनाले दाँत निकाल्नका साथै ४१ जनाले सुगर तथा प्रेसर परीक्षण गरेको छ ।
दन्त सेवाको बिहीबार अस्पताल परिसरमा एक कार्यक्रमको आयोजना गरी रोटरी डिस्ट्रिक्ट ३२९२ नेपाल–भुटानका डिस्ट्रिक्ट गभर्नर राजेन्द्र प्रसाद धोजुले सेवाको उद्घाटन गरेका हुन् । उद्घाटन कार्यक्रममा बोल्दै डिस्ट्रिक्ट गभर्नर धोजुले नेपालका ग्रामीण क्षेत्रलाई लक्षित गरी खुर्कोटमा स्थापना गरिएको अत्याधुनिक उपकरण सहितको दन्त सेवाले धेरैलाई सहयोग पु¥याउनेमा आफू विश्वस्तता रहेको धारणा राखेका छन् । धोजुले रोटरी क्लबले उपलब्ध गराएको अत्याधुनिक मेसिन सहितको सेवालाई सही सदुपयोग भएमा आफूहरूले थप सहयोग गर्ने पनि प्रतिबद्धता समेत जनाएका छन् ।
दन्त सेवा स्थापना कार्यक्रममा बोल्दै गोलञ्जोर गाउँपालिकाका अध्यक्ष शङ्कर राज बरालले दन्त सेवा स्थापनामा सहयोग पु¥याउने रोटरी क्लबलाई धन्यवाद दिँदै आगामी दिनमा दन्त सेवालाई सञ्चालनमा गाउँपालिकाले सहयोग गर्ने प्रतिबद्धता जनाए । रोटरी क्लब अफ रुद्रमती काठमाण्डौको २०२०–२१ का अध्यक्ष सुदिप कोइरालाको पहलमा सिन्धुलीको खुर्कोटमा अत्याधुनिक उपकरण सहितको दन्त सेवा सुरु गर्न सफल भएको सुनकोसी सामुदायिक अस्पतालका अध्यक्ष केशव देवकोटाले बताए ।
दाँत उपचारको लागि काठमाण्डौका महँगा अस्पतालमा जानु पर्ने बाध्यतालाई हटाउनको लागि र गाउँमै गुणस्तरीय दन्त सेवा दिनको लागि रोटरी क्लबको सहयोगमा दन्त सेवा सुरु गरिएको सुनकोसी सामुदायिक अस्पतालका अध्यक्ष केशव देवकोटाले बताए । काठमाण्डौमा पुरै दाँतको एक्स–रे गर्दा झन्डै ४ हजार पैसा तिर्नु पर्ने एक्स–रे खुर्कोटमै एक हजारमा हुने पनि अध्यक्ष देवकोटाले बताएका छन्।
विशेष एक्स–रे ओपीजी मेसिन मार्फत एक पटकमा सबै दाँतको एक्स–रे गर्न सकिने भएको हुँदा दाँतमा भएका सबै समस्या पत्ता लाग्ने र उपचार गर्न सहज हुने सुनकोसी सामुदायिक अस्पतालको दन्त सेवामा कार्यरत डेन्टल सर्जन कृशला कुमारी चौधरीले बताइन् । उनका अनुसार खुर्कोट दन्त सेवाबाट दाँत फुकाल्ने, दाँत सफा गर्ने, किराले खाएको दाँतमा सिमेन्ट भर्ने, नयाँ दाँत राख्ने लगायतका सेवा प्रवाह हुने छन् ।
