जनकपुरधाम – प्रधानमन्त्री केपी शर्मा ओलीले राष्ट्रिय गौरवको सुनकोशी–मरिन डाइभर्सन बहुउद्देश्यीय परियोजनामा ढिलाइ सह्य नहुने बताएका छन् । मधेस प्रदेशको जनकपुरधाममा एकैपटक ६४ सडक आयोजनाको शिलान्यास गर्दै प्रधानमन्त्री ओलीले समयमै काम सम्पन्न नभए ठेक्का तोडिने चेतावनी दिए ।
प्रधानमन्त्रीले मधेसका जनता सिँचाइको आशामा जमिन बाँझो राख्न बाध्य हुन नसक्ने उल्लेख गर्दै परियोजना छिटो सक्न निर्देशन दिए । उनले ढिलासुस्तीलाई भ्रष्टाचारभन्दा ठूलो अपराध भन्दै विकासको गति रकेटजस्तै बनाउनु पर्ने बताए ।
सुनकोशी नदीको पानी मरिन नदीमा स्थानान्तरण गरिने यस परियोजनाबाट रौतहट, धनुषा, महोत्तरी, सर्लाही र बाराका १ लाख २२ हजार हेक्टर जमिनमा सिँचाइ सुविधा पु¥याइनेछ भने ३१.०७ मेगावाट विद्युत् उत्पादन गरिनेछ । रु. ४९ अर्ब ४२ करोड लागतको यो आयोजना गत वर्ष बाढी र पहिरोका कारण केही समय प्रभावित भएको थियो ।
प्रधानमन्त्री ओलीले मधेस प्रदेशलाई ऐतिहासिक र पवित्र भूमि भन्दै त्यसको समग्र विकासमा संघीय सरकार प्रतिबद्ध रहेको बताए । जनकपुर रेल सेवा घाटा अन्त्यका लागि दक्ष जनशक्ति विकास गरिने उल्लेख गर्दै उनले चुरे संरक्षण, कृषि आधुनिकीकरण, युवा लक्षित कार्यक्रम, शिक्षा र स्वास्थ्यमा सुधार, रंगशाला निर्माण तथा ‘छोरी पढाऔँ’ अभियानमा विशेष प्राथमिकता दिने प्रतिवद्धता जनाए ।
सुशासनका लागि सबैको सहभागिता आवश्यक भएको उल्लेख गर्दै उनले राम्रो कार्य गर्नेको प्रशंसा र गल्ती गर्ने जोकोहीमाथि कारबाही हुने स्पष्ट पारे ।
