रामेछाप । सुनापती गाउँपालिकाले पालिकाभित्रका ६२ जना एकल पुरुषलाई मासिक १ हजारका दरले भत्ता बितरण गरेको छ ।
सुनापती गाउँपालिकाले यसअघि एकल महिलालाई मासिक रुपमा भत्ता बितरण गर्दै आएको यस चालु आर्थिकवर्ष २०७८÷७९ बाट पालिका भित्रका एकल पुरुषलाई पनि मासिक रुपमा भत्ता वितरण गर्ने गरी निती तथा कार्यक्रम बनाएर बितरण शुरु गरेको हो । सुनापति गाउँपालिकामा रहेका ५ वटै वडामा रहेका एकल पुरुषको वडा स्तरबाट विवरण संकलन गरिएको सुनापति गाउँपालिकाका प्रमुख प्रशासकिय अधिकृत कमल राज श्रेष्ठले जानकारी दिए ।
उनले भने– पालिकाको चालु आर्थिकवर्षमा एकल पुरुषलाई दिने भत्ताको बिषयमा दुई छुट्टाछुट्टै कार्यविधि वनाएका छौं । जसमा विवाहित र अविवाहित भनेर छुट्टाइएको छ । पालिकाले भत्ता वितरण गर्दा विवाहपछि एकल भएको पुरुषको हकमा उमेर हद ५० वर्ष र अविवाहित पुरुषको हकमा उसको उमेर ६० वर्ष पुगेको हुनुपर्ने प्रावधान रहेको पनि अधिकृत श्रेष्ठले बताए ।
यसअघि पालिकामा एकल महिलाले मात्रै मासिक रुपमा भत्ता बुझ्दै आएकोमा एकल पुरुषलाई पनि थोरै भएपनि राहात मिलोस् भन्ने उद्धेश्यले यो कार्यक्रम ल्याइएको सुनापति गाउँपालिकाका प्रमुख धावा लामाले जानकारी दिए । उनले भने– हामीले ५ वटै वडा कार्यालय मार्फत के–कती एकल पुरुष छन् तीनको विवरण माग गर्यौ । वडा कार्यालय मार्फत आएका विवरणमध्ये कोही छुटेको खण्डमा सिधै पालिकाको कार्यालयमा आएर निवेदन दिन पनि सकिने गरी व्यस्था मिलाइएको पनि अध्यक्ष लामाले बताए ।
हाल सुनापति गाउँपालिकाको वडा नं १ देखी ५ नम्वरसम्म क्रमसः ८,१८,१०,१६,१० गरी ६२ जना एकल पुरुष रहेका छन् । अहिलेसम्म राज्यवाट कुनै पनि सुविधा पाउन नसकेका एकल पुरुषहरुले पालिकाले मासिक रुपमा १ हजारका दरले नगद नै दिन थालेपछि उनीहरु जनप्रतिनिधिहरु प्रति खुशी भएका छन् ।
