रामेछाप — पर्यटन क्षेत्रको अपार सम्भावना बोकेको सुनापति गाउँपालिकाको दिगो विकासका लागि सबै तह, क्षेत्र र सरोकारवालाबीच सहकार्य आवश्यक रहेकोमा जोड दिइएको छ। नेपाल पर्यटन बोर्डको सभाहल, भृकुटीमण्डपमा आइतबार सम्पन्न अन्तरक्रिया कार्यक्रममा प्रतिनिधिसभा सदस्य, पूर्वमन्त्री, विभिन्न राजनीतिक दलका नेता, पर्यटन विज्ञ तथा सरोकारवालाहरूले सुनापतिलाई राष्ट्रिय तथा अन्तर्राष्ट्रिय पर्यटन गन्तव्य बनाउने साझा प्रतिबद्धता व्यक्त गरेका हुन्।
कार्यक्रमका प्रमुख अतिथि तथा प्रतिनिधिसभा सदस्य पूर्णबहादुर तामाङ (कान्छाराम) ले सुनापतिमा विविध पर्यटकीय सम्भावना रहेको उल्लेख गर्दै पूर्वाधार निर्माण र पहुँच विस्तारमा प्राथमिकता दिनुपर्ने बताए। उनले खाँडादेवी र दोरम्बाशैलुङ गाउँपालिकासम्मको सडक कालोपत्रे गरी सुनापति क्षेत्रलाई समग्र सञ्जालमा जोड्न सके पर्यटकीय प्रवाह उल्लेखनीय रूपमा वृद्धि हुने विश्वास व्यक्त गरे।
पूर्व सांसद श्यामकुमार श्रेष्ठले रामेछापमा युद्ध पर्यटनको सम्भावना औँल्याउँदै, सुनापतिमा रहेका युद्धसम्बन्धी स्मृतिस्थलहरूको संरक्षण र व्यवस्थापन गरी नयाँ प्रकारको पर्यटन प्रवर्द्धन गर्न सकिने धारणा राखे। उनका अनुसार सुनापति, खाँडादेवी र दोरम्बा शैलुङलाई समेटेर आकर्षक आन्तरिक पर्यटनको रूप दिन सकिन्छ।
त्यसैगरी, नेकपा (एकीकृत समाजवादी) का केन्द्रीय सदस्य देवशंकर पौडेलले सुनापति र दोरम्बाबीच सहकार्य गर्दै तामाखानी सुरुङहरूको वैज्ञानिक अनुसन्धान र पर्यटकीय विकासको प्रस्ताव राखे। उनले सुवेदार जम्दार धारो, अग्लेश्वरी पहाडलगायतका पुरातात्त्विक स्थलहरूको संरक्षण र प्रचारप्रसार गरिएमा सुनापति समृद्ध पर्यटन क्षेत्र बन्न सक्ने धारणा राखे।
नेकपा (एमाले) का केन्द्रीय सदस्य तथा रामेछाप इन्चार्ज कमलप्रसाद चौलागाईंले क्षेत्रको मौलिकता, सांस्कृतिक विविधता र प्राकृतिक सौन्दर्यको सदुपयोग गर्दै दिगो पर्यटन विकास सम्भव हुने बताए। उनले सबै राजनीतिक दलहरूको सहकार्य आवश्यक रहेको उल्लेख गर्दै पर्यटनलाई साझा विकासको एजेन्डा बनाउनु पर्नेमा जोड दिए।
नेपाल विद्युत प्राधिकरणका निवर्तमान कार्यकारी निर्देशक कुलमान घिसिङले सुनापतिको पर्यटकीय स्थलहरूलाई प्राथमिकतामा राखेर रणनीतिक योजना बनाउनु पर्नेमा जोड दिँदै यस्ता क्षेत्रहरूबाट गाउँको पहिचान बदल्न सकिने बताए।
कार्यक्रममा बागमती प्रदेशसभा सदस्य युवराज चौलागाईं, नेपाल ललितकला प्रज्ञा–प्रतिष्ठानका कुलपति नारदमणि हार्तम्छाली, नेपाल पर्यटन बोर्डका उपाध्यक्ष रामप्रसाद सापकोटा ‘कमल’, ट्रेकिङ एजेन्सी एसोसिएसन अफ नेपाल (टान) का अध्यक्ष सागर पाण्डे लगायत वक्ताहरूले होमस्टे, पदमार्ग, साहसिक, धार्मिक तथा सांस्कृतिक पर्यटन प्रवर्द्धनका सम्भावनाबारे धारणा राख्दै संघीय, प्रदेश र स्थानीय सरकारबीचको समन्वय, निजी क्षेत्रको संलग्नता र स्थानीय तहको सक्रियताका विषयमा जोड दिए।
कार्यक्रमको अध्यक्षता गर्दै गाउँपालिकाका अध्यक्ष ठुलो कान्छा तामाङले सुनापतिलाई समृद्ध गन्तव्य बनाउन संरचना निर्माण, प्रचारप्रसार, संरक्षण र साझेदारीलाई प्राथमिकतामा राखिएको जानकारी दिए। उनले पर्यटन सम्भावना भएका क्षेत्रहरूको पहिचान गरी पूर्वाधार विकास, लगानी आह्वान र समुदायको संलग्नतामार्फत समुन्नत पर्यटन क्षेत्र निर्माण गर्ने प्रतिबद्धता व्यक्त गरे।
कार्यक्रमको सुरुमा गाउँपालिकाकी उपाध्यक्ष गीता विष्टले कार्यक्रमको उद्देश्यबारे जानकारी गराएकी थिइन्। साथै, सुनापतिमा रहेका प्रमुख पर्यटकीय स्थलहरूको श्रव्यदृश्य सामाग्री समेत प्रस्तुत गरिएको थियो। कार्यक्रम सुनापति गाउँपालिकाको आयोजनामा नेपाल पर्यटन बोर्डको सहकार्यमा सम्पन्न भएको हो, जसको जानकारी प्रमुख प्रशासकीय अधिकृत सुरेशकुमार श्रेष्ठले दिए।
