रामेछाप । रामेछाप जिल्लाको सुनापति गाउँपालिकाले सार्वजनीक सुनुवाई कार्यक्रम सम्पन्न गरेको छ । सार्वजनीक सुनुवाई कार्यक्रममा चालु आर्थिक वर्षको ८ महिनामा जम्मा बजेटको ४६ प्रतिशत बजेट खर्च गरेको प्रतिबेदनमा उल्लेख गरेको छ ।
गाउँपालिकाले चालु आर्थिक वर्ष २०८१÷०८२ को साउनदेखि फागुन महिनासम्म जम्मा ५६ करोड ९० लाख ५२ हजार रुपैयाँ बजेटको ४६.८४ प्रतिशत अर्थात् २६ करोड ६५ लाख ८४ हजार ३९२ रुपैयाँ खर्च गरेको जनाएको छ ।
यो अवधिसम्म चालु तर्फ ३६ करोड ६६ लाख ९० हजार ८०० रुपैयाँ बजेट रहेकोमा ५५.३८ प्रतिशत अर्थात् २० करोड ३० लाख ७४ हजार ९९३ रुपैयाँ बजेट खर्च भएको बिहीबार गाउँपालिकामा सम्पन्न सार्वजनिक सुनुवाइ कार्यक्रममा प्रमुख प्रशासकीय अधिकृत सुरेश कुमार श्रेष्ठले बताउनु भयो ।
दोस्रो चौमासिकसम्म गाउँपालिकाले सञ्चालन गरेको विकास निर्माण तथा सेवा प्रवाह विषयमा भएको सार्वजनिक सुनुवाइ कार्यक्रममा प्रमुख प्रशासकीय अधिकृत श्रेष्ठले पुँजीगत तर्फ २० करोड २३ लाख ६१ हजार २०० रुपियाँ बजेट रहेकोमा ३१.३८ प्रतिशत अर्थात् ६ करोड ३५ लाख ९ हजार ३९८ बजेट खर्च भएको बताउनु भएको हो ।
पाँच वटा वडा रहेको सुनापति गाउँपालिकामा चालु आर्थिक वर्ष २०८१÷०८२ मा ९० वटा भन्दा बढी योजनाहरू सम्पन्न हुनुपर्नेमा ४४ वटा योजनाको भुक्तानी भएको उहाँले बताउनुभयो ।
कार्यक्रममा सहभागीहरूले शिक्षा, स्वास्थ्य, सडक पूर्वाधार, महिला र कृषि क्षेत्रका कार्यक्रमसँग जोडिएका प्रश्न तथा जिज्ञासा राखेका थिए । प्रश्नहरूको गाउँपालिका अध्यक्ष ठुलो कान्छा तामाङ, उपाध्यक्ष गीता विष्ट, प्रमुख प्रशासकीय अधिकृत सुरेश कुमार श्रेष्ठ र वडा अध्यक्षहरूले जवाफ दिनुभएको थियो ।
